Nur-Sultanda halyqtyń 68% koronavırýs vaktsınasynyń 1-komponentin aldy
«Pandemııa bastalǵaly elordada koronavırýspen syrqattanýdyń 144 161 jaǵdaıy tirkeldi, onyń ishinde 139 myńnan astam adam saýyǵyp shyqty. Bul jalpy naýqastardyń 97% quraıdy. Tamyzdyń aıaǵy men qyrkúıektiń basynda qala boıynsha epıdemıologııalyq jaǵdaı jaqsardy. Búginde qala «qyzyl» aımaqta qalyp otyr», - dedi A. Oralov Ortalyq kommýnıkatsııalar qyzmetinde ótken baspasóz máslıhatynda.
Qazirgi ýaqytta elorda boıynsha 990 tósek-oryn qory bar 7 ınfektsııalyq statsıonar qyzmet etedi. Al jaz mezgilinde syrqattaný órshigen kezde – 4 myńǵa jýyq tósek-oryn qory bar 16 ınfektsııalyq statsıonar qyzmet atqarǵan edi.
«Tańǵy málimetke sáıkes 578 adam kovıdti statsıonarlarda em qabyldap jatyr, tósek-orynnyń 58,4% naýqastar jatyr. Jaz aılarynda bul kórsetkish 70% astam edi. Shilde aıynyń basynda 600 adamǵa arnalǵan kovıdti aýrýhana retinde beıimdelgen Kópbeıindi №1 qalalyq aýrýhana osy aptada ınfektsııalyq qyzmetin toqtatyp, óziniń bastapqy qyzmetine oraldy», - dedi ákim orynbasary.
Onyń aıtýynsha, qala boıynsha KVI-ge qarsy vaktsına alýǵa tıisti kontıngenttiń kóp bóligi ekpe aldy.
«Koronavırýspen kúrestiń basty quraldarynyń biri – halyqty vaktsınalaý bolyp otyr. Elorda boıynsha vaktsına alýǵa jatatyn halyq sany - 647 myń adam. Onyń 68 paıyzy nemese 436 myńnan astam azamat vaktsınanyń birinshi komponentin aldy, al tolyq ımmýndaýdan 401 myńnan kóp azamat ótti. Halyqty jappaı vaktsınalaýmen qamtý úshin 36 medıtsınalyq uıymda jáne qalanyń 5 saýda kesheninde («Kerýen», «Han Shatyr», «Abý-Dabı Plaza», «Azııa park» saýda, oıyn-saýyq ortalyqtary jáne «Eýrazııa» saýda úıi) vaktsınalaý pýnkteri ornalasqan. Jappaı vaktsınalaý bastalǵannan beri saýda, oıyn-saýyq ortalyqtary men saýda úılerinde ekpeni 100 myńǵa jýyq azamat aldy. Halyqty vaktsınalaý úshin 300-den astam medıtsınalyq qyzmetker jumyldyrǵan», - dedi A. Oralov.
