Nur-Sultanda halyqaralyq sarapshylar «jasyl qarjy» máselelerin talqylaıdy
Forýmdy ortalyq Ulybrıtanııa bıznes, energetıka, ónerkásiptik strategııa departamentiniń qoldaýymen, Tsınhýa ýnıversıtetimen jáne halyqaralyq qarjy korporatsııasymen (IFC) birlesip uıymdastyrǵan.
Jıynnyń ashylý saltanatynda AHQO basqarýshysy Qaırat Kelimbetov 2017 jyly Eýropa qaıta qurý jáne damý bankimen birlesip, Qazaqstannyń «jasyl qarjylyq» júıesi tujyrymdamasynyń bazasy qabyldanǵanyn eske saldy.
Al 2018 jyldyń maýsym aıynda «jasyl qarjy» boıynsha AQHO keńesi quryldy. Keńeske jahandyq jıyrmalyq deńgeıindegi turaqty qarjylandyrý kóshbasshylary múshe boldy.
«Búginde AHQO halyqaralyq sarapshylarmen birlesip, óz quzireti aıasynda jasyl qarjyǵa arnalǵan retteýshi baza qurýmen aınalysyp jatyr. Sonymen birge, QR Ekologııa, geologııa jáne tabıǵı resýrstar mınıstrligimen jasyl qarjylandyrýdy damytý baǵytynda belsendi jumys atqarýdamyz. Ekologııa kodeksi jobasyn ázirleý men ony Parlamentte qorǵaý «jasyl qarjymen» baılanysty kóptegen ınnovatsııalardy engizýge múmindik bererine úmittenemin», - dedi Qaırat Kelimbetov.
Onyń aıtýynsha, AHQO bırjasynda alǵashqy táýelsiz «jasyl» oblıgatsııalardy shyǵarý úshin ortalyq memlekettik kvazımemlekettik uıymdarmen yntymaqtastyq ornatqan.
«Islamdyq qarjylandyrýdy damytý aıasynda jasyl sýkýk ıaǵnı, jasyl ıslam qaǵazdaryn shyǵarýmen aınalysyp jatyrmyz. Odan bólek, jańa jasyl qarjy quraldaryn qoldaný úshin, jasyl jobalar pýlyn qurý úshin Nur-Sultan, Almaty qalalarynyń ákimdikterimen belsendi jumys isteýdemiz. «Astana» halyqaralyq qarjy ortalyǵy alańy jasyl qarjy salasynda Ortalyq Azııa kóshbasshysyna aınalady dep senemiz. Bul úshin bizdiń alańda bar jaǵdaı jasalǵan. 2017 jyly joǵarǵy deńgeıde zańnamalyq túzetýler qabyldanǵan bolatyn», - dedi Q. Kelimbetov.
Aıta keteıik, «jasyl qarjy» - aýanyń lastanýyn tómendetýge, sý, energııa men jylýdy tutynýdy azaıtý syndy baǵyttaǵy jobalardy damytýǵa kómektesetin qarjylyq resýrstar. Termın qorshaǵan ortany saqtaý ıdeıasyna negizdeledi. Qazaqstan - postkeńestik elder arasynda «jasyl ekonomıkaǵa» kóshken alǵashqy memleket.
