Nur-Sultanda gaz ballonyn zańsyz paıdalanǵandar anyqtaldy

NUR-SULTAN. QazAqparat – Elordada 2 qabattan joǵary ǵımarattarda gaz ballonynyń zańǵa sáıkes qoldaný jaǵdaıy tekserildi. Bul týraly Nur-Sultan qalasy qalalyq orta sapasy jáne baqylaý basqarmasynyń baspasóz hatshysy Dana Turǵynova QazAqparat tilshisine bergen suhbatynda aıtyp berdi.

«Qazaqstan Respýblıkasynyń 2012 jylǵy 9 qańtardaǵy № 532-IV «Gaz jáne gazben jabdyqtaý týraly» Zańyna sáıkes eki qabattan asatyn kóp páterli turǵyn úılerdegi turmystyq ballondarda suıytylǵan munaı gazyn saqtaýǵa jáne (nemese) paıdalanýǵa tyıym salynady. Osy oraıda bizdiń basqarma páter ıeleriniń kooperatıvi (PIK), basqarýshy uıymdardyń ókilderimen birlesip, turmystyq ballondarda suıytylǵan gazdy durys ári zańdy paıdalanýdy túsindirý maqsatynda 556 oqytý ótkizildi. Sonyń barysynda eki qabattan joǵary turǵyn úıler men ǵımarattarda ballondardy zańsyz paıdalanýdyń 34 jaǵdaıy anyqtalyp, joly kesildi», - dedi D. Tursynova.

Onyń aıtýynsha, búginde elordada 340 jınaqtama rezervýarlyq jáne 1400 jer astyndaǵy rezervýarlyq qondyrǵy bar.

«Sondaı-aq, turǵyn úı aýlalary men kireberisindegi suıytylǵan gazdyń aǵýy men ıisterin boldyrmaý jáne joıý maqsatynda qalanyń avarııalyq qyzmetterimen jáne 109 qyzmetimen ózara is-qımyl jasaý boıynsha jumystar júrgizilýde. Onyń barysynda 245 baqylaý, tekserý sharasy uıymdastyrylyp, anyqtalǵan sebepter joıyldy», - deıdi ol.

Atalǵan basqarma bergen málimetke súıensek, 2019 jyly qala boıynsha barlyǵy 1400 rezervýarlyq qondyrǵy tekserildi. Nátıjesinde «AstanaGazQyzmet» JShS-ne aıqyndalǵan eskertýlerdi joıýǵa arnalǵan 340 anyqtama berildi.