Nur-Sultanda fontandar iske qosyldy
NUR-SULTAN. QazAqparat – Nur-Sultanda fontandar iske qosyldy, dep habarlaıdy QazAqparat elorda ákimdiginiń resmı saıtyna silteme jasap.
Esil aýdanynda 48 sýburqaqtan turatyn 25 sýburqaq kesheni ornalasqan. Onyń tórteýi — mýzykalyq («Nurjol» jelekjoly, EHRO-2017, Botanıkalyq baq, «Jetisý» saıabaǵy). Ótken jyly «Nurjol» jelekjolyndaǵy osyndaı fontandardyń birinde repertýar jańartyldy. Endi ol jerde Batyrhan Shúkenovtiń, Dımash Qudaıbergenniń ánderi, Abaı Qunanbaıulynyń «Kózimniń qarasy» jáne ózge de ánder shyrqalady.
«Esil ózeniniń jaǵasyndaǵy saıabaqty 2020 jyly jóndeý barysynda úsh fontannyń apatty jaǵdaıda (2005 jyly salynǵan) ekeni anyqtaldy. Qazir turǵyndardyń ótinishi boıynsha eski fontandardyń ornyna 4 jańa kúrdeli ınjenerlik qurylystar ornatyldy. Onda bakterııalardy, vırýstardy jáne basqa da organızmderdi ýltrakúlgin sáýlesi arqyly óltiretin zamanaýı sý tazartý júıesi birge ornatyldy.
Ortalyq fontanda 112 shamnan turatyn jaryq-dınamıkalyq jaryǵy bar, sonymen qatar 56 sý aǵyny 1,5 metr deńgeıinde joǵary kóteriledi. Fontanda bıiktigi 1 metrge deıin jasandy tuman jasaý fýnktsııasy bar. Ol sýburqaqtyń tostaǵanyna tikeleı ornatylǵan 56 saptama arqyly júzege asyrylady. Jaz mezgilinde mundaı fontan jasandy tuman jasaý esebinen saıabaqqa kelýshilerge jaǵymdy áser qaldyrady», — dep atap ótti Esil aýdanynyń baspasóz qyzmetinen.
Sonymen qatar, bıyl qalanyń kommýnaldyq menshigine «Lıneınyı» saıabaǵynda ornalasqan 1 sýburqaq keshenin berý josparlanýda.
Saryarqa aýdany aýmaǵynda 11 fontan iske qosyldy:
1) Máskeý kóshesindegi gúlzar fontany;
2) «Ómir Aǵashy» fontany;
3) «Qazaq drama teatry» fontany;
4) «Aınalmaly shar» fontany;
5) «Álııa Moldaǵulova eskertkishi» fontany;
6) Abaı dańǵyly men Jeltoqsan kóshesiniń qıylysyndaǵy fontan;
7) «Jastar teatry» fontany;
8) «Atyraý» fontany;
9) «Sıren» fontany;
10) Jeńis dańǵylyndaǵy «Aqjaıyq» saıabaǵynyń fontany;
11) «Halyqtar dostyǵy» fontany.
Aıta keterligi, «Halyqtar dostyǵy» jáne «Qazaq drama teatry» fontandarynda jańǵyrtý jumystary júrgizilýde.
Almaty aýdanynda 9 fontan iske qosyldy:
1. «Prezıdenttik saıabaq» fontan kesheni;
2. «Qazaq Eli» fontan kesheni;
3. «Áziret Sultan» fontan kesheni;
4. Otan qorǵaýshylar eskertkishindegi fontan kesheni;
5. B. Momyshuly dańǵylyndaǵy Oqýshylar saraıynyń fontany;
6. Táýelsizdik Saraıy janyndaǵy sýburqaq kesheni;
7. B. Momyshuly eskertkishi gúlzaryndaǵy fontan;
8. «Aq Bulaq» fotany;
9. «Beıbitshilik jáne kelisim» saraıynyń janyndaǵy fontan kesheni.
Baıqońyr aýdanynda tórt fontan iske qosyldy. Olar Respýblıka dańǵyly boıyndaǵy «Jastar» fontany jáne «Esil» saýda úıi mańyndaǵy «Bulaq» fontandary.
