Nur-Sultanda Eýroodaqtyń aýqymdy úsh baǵdarlamasy iske qosyldy

NUR-SULTAN. QazAqparat – Nur-Sultanda Eýropa odaǵynyń Ortalyq Azııadaǵy aýqymdy úsh baǵdarlamasyn iske qosý týraly kelisimge qol qoıý rásimi ótti, dep habarlaıdy QazAqparat tilshisi.

Olar: 5 mln eýro quıylǵan Ortalyq Azııa Invest, 15 mln eýro qarajat salynǵan Ortalyq Azııadaǵy halyqaralyq saýdany ilgeriletý jáne 8 mln eýronyń Ortalyq Azııada zań ústemdigin damytý jobalary.

«Yntymaqtastyqtyń basty artyqshylyǵy – naqty nusqaýlardyń bolýy, is júzine asyrylýy jáne Brıýssel tarapynan tıisti qarjylaı qoldaý kórsetilýi. Búgin tanystyrylǵan úsh baǵdarlama sol artyqshylyqtyń is júzindegi naqty kórinisi», - dedi QR syrtqy ister mınıstriniń orynbasary Roman Vasılenko Rixos Astana President Hotel qonaqúıinde ótken baspasóz máslıhatynda.

R. Vasılenkonyń atap ótýinshe, jalpy 2019 jyl Qazaqstannyń Eýroodaqpen ekijaqty jáne óńiraralyq qatynasy tarıhynda mańyzdy jyl boldy.

«Biz bıyl EO-nyń Ortalyq Azııa boıynsha jańa strategııasyn qabyldaýyna kýá boldyq. EO elderi Eýropalyq odaq, oǵan múshe memleketter men Qazaqstan arasynda keńeıtilgen seriktestik pen yntymaqtastyq týraly kelisimdi rásimdeý protsesin aıaqtady. Taıaý ýaqytta ony kúshine enedi dep kútip otyrmyz. Jazda EO Prezıdenti Donald Týsk Qazaqstanǵa saparlap, ózara qatynastyń barlyq salasy boıynsha yntymaqtastyǵymyzǵa aıtarlyqtaı serpin berdi. Shildede QR Premer-Mınıstri Asqar Mamın EO ekonomıkalyq máseleler jónindegi elshisimen turaqty túrde kezdesýler ótkize bastady. Keshe osy formatta úshinshi kezdesý ótti», - dedi ol.

Óz kezeginde, Eýropa odaǵynyń Qazaqstan Respýblıkasyndaǵy elshisi Sven-Olov Karlsson jańa óńirlik baǵdarlamalar saýda kólemin ulǵaıtýǵa, JІÓ ósimin jyldamdatýǵa, jańa jumys oryndaryn ashýǵa jaǵdaı jasaıtynyn ári ol jobalardy basqarý qyzmeti aıasynda baqylanatynyn atap kórsetti.

Avtory: Azamat Syzdyqbaev