Nur-Sultanda Esil jáne Aqbulaq ózenderiniń aýmaǵy qoqystan tazartyldy
NUR-SULTAN. QazAqparat – Elordanyń Qorshaǵan ortany qorǵaý jáne tabıǵatty paıdalaný basqarmasy «JasNur» MKQK-men birlesip jyl saıyn qalanyń ózenderi men sý qoımalarynyń aýmaǵyn tazartý jumystaryn júrgizedi. Qazirgi ýaqytta ekologııalyq aılyq aıasynda bul jumystar kúsheıtildi, dep habarlaıdy qala ákimdiginiń resmı saıty.
Esil ózeniniń 20 km-ge jýyq, Aqbulaq – 7 km, Sarybulaq – 4,5 km aýmaǵyn sanıtarlyq tazartý jumystary júrgizildi.
Esil ózeni men onyń aýmaǵynan mamandar 7 tonnadan astam qoqys jınady.
«Biz qaladaǵy barlyq ýchaskelerdi taza ustaýǵa tyrysamyz. Biraq kóp nárse elorda turǵyndary men qonaqtarynyń ózderine, olardyń tabıǵatqa, aýlaǵa, kóshege degen qurmetine baılanysty. Turǵyndar, uıymdar, kompanııalar óz tarapynan kómek kórsetip, qalamyzǵa uqypty qaraýy kerek. Qala boıynsha barlyq jerde qoqys jınaýǵa, shyǵarýǵa arnalǵan oryndar bar, tek arnaıy bólingen orynǵa aparý nemese aparý qajet», - dep atap ótti tıisti basqarma.
Esterińizge sala keteıik, buǵan deıin Sarybulaq ózeniniń jaǵasyn Qarasaı batyr kóshesinen N.Tilendıev kóshesine deıin, ıaǵnı 2,5 km aýmaq qoqystan tazartylǵan bolatyn. Sanıtarlyq tazalyq barysynda 70 qaptan astam qoqys jınaldy, onyń negizgi bóligi turmystyq qaldyqtar men polımerler boldy.
