Nur-Sultanda «elektrondy mektep» platformasy jasaldy
NUR-SULTAN. QazAqparat - «Elordalyq elektrondy mektep» platformasy jasaldy. Bul týraly Nur-Sultan qalalyq bilim basqarmasynyń basshysy Sholpan Qadyrova aıtty, dep habarlaıdy QazAqparat tilshisi.
«Budan buryn da aıtqanymyzdaı, oqý úderisi qashyqtyqtan jumys rejıminde sanıtarlyq-epıdemıologııalyq erejeler men oqý ýaqytyn utymdy paıdalaný normalarynyń talaptaryn eskere otyryp, sınhrondy jáne asınhrondy formatta júzege asyrylýy múmkin. Sabaqtyń asınhrondy formaty ınternet-platformalardyń múmkindikteri arqyly muǵalimniń bilim alýshylarmen ózara árekettesýin, sonyń ishinde oqýshylar ózindik jumysy úshin muǵalimnen keri baılanys alyp otyrady. Muǵalim sabaqqa arnalǵan oqý tapsyrmalaryn ınternet-platformalardyń mazmuny men múmkindikterin eskere otyryp jasaıdy. Buǵan elektrondy oqýlyqtar, beınematerıaldar, sheberlikke baýlý trenajerleri, bilimdi baqylaý resýrstary jáne basqalaryn qosa sandyq bilim berý resýrstary kiredi», - dedi ol elorda ákimdiginde ótken baspasóz máslıhatynda.
Buǵan qosa onyń aıtýynsha, «Elordalyq elektrondy mektep» elektrondyq platformasy jasaldy.
«Onda barlyq deńgeılerge arnalǵan beıne sabaqtar, qysqa merzimdi sabaq josparlary, bilim berýdiń sandyq qorlary jáne taǵy basqaralary ornalastyrylǵan. Júıelik-ádistemelik keshenge bilim berýdiń barlyq deńgeıiniń muǵalimderi úshin aqysyz ári qol jetimdilik bolady», - dedi Sholpan Qadyrova.
