Nur-Sultanda eki jańa gaz qazandyǵy salynady
NUR-SULTAN. QazAqparat – Elordada eki jańa gaz qazandyǵy salynady. Bul týraly qala ákimi Altaı Kólginov aıtty, dep habarlaıdy QazAqparat tilshisi.
«Endi elordanyń tynys-tirshiligine qatysty mańyzdy máselelerge toqtalaıyn. Bizde jylý berý maýsymy aýa raıyna baılanysty 7,5, tipti 8 aıǵa sozylady. Bul ekonomıkaǵa óte úlken júkteme. Prezıdent tapsyrmasyna sáıkes úshinshi Jylý elektr stanasynyń jumysyn jandandyrdyq. Keler jyly iske qosýǵa tıispiz. Ol 420 Gkal jylý beredi nemese 6,5 mln sharshy metr turǵyn úı men basqa da nysandardy jylýmen qamtamasyz etedi», - dedi ol Nur-Sultan qalalyq máslıhatynyń kezekten tys sessııasynda.
Qala basshysynyń atap ótýinshe, elordada jyl saıyn 3 mln baspana salynatyn bolady. Al mundaı jaǵdaıda atalǵan stansa qalany jylýmen tolyqtaı qamtamasyz ete almaıdy.
«Sondyqtan ótken jyly sheshim qabyldap, ony Úkimet maquldady jáne árbiri 360 Gkal bolatyn 2 jańa gaz qazandyǵynyń qurylysyna qarjy bólinedi. Demek, kelesi jyldyń sońyna qaraı 1 100 Gkaldan astam jylý alýymyz kerek. Bul elordamyzdyń, ásirese jańa qurylys aýdandarynyń uzaqmerzimdi tynys-tirshiligin qamtamasyz etedi. Máselen, 2020 jyly tek Esil aýdanynyń turǵyndary 40 myń adamǵa ósti. Bul oblystardaǵy 2-3 aýdan turǵynymen teń», - dedi Altaı Kólginov.
