Nur-Sultanda eki kúnde karantın tártibi 36 ret buzylǵan
NUR-SULTAN. QazAqparat – Nur-Sultandaǵy arnaıy mobıldik toptar eki kúnde 36 tártip buzý faktisin tirkedi, dep habarlaıdy QazAqparat Nur-Sultan qalasynyń Polıtsııa departamentine silteme jasap.
Sońǵy eki kúnde polıtseıler, epıdemıologtar, volonterler men jergilikti atqarýshy organ ókilderinen quralǵan mobıldik toptar Nur-Sultan qalasynda 36 tártip buzý oqıǵasyn tirkedi. Olardyń 13-i maska taǵý men áleýmettik qashyqtyqty saqtamaý syndy mindetti ereje bolsa, 23-i tyıym salynǵan ýaqytta da jumysyn jalǵastyrǵan kásipkerlerge qatysty.
Materıaldar densaýlyq saqtaý jergilikti atqarýshy organy – taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi.
Polıtseıler oıyn-saýyq nysandaryna, qoǵamdyq tamaqtaný oryndary, saýna, monsha, attraktsıondarǵa baryp, karantın erejelerin túsindirip, tártip buzý faktilerin anyqtaıdy.
26 shilde kúni túngi 02:18-de Maılın kóshesinde kelýshilerdi qabyldap jatqan kafeni anyqtaǵan. Barda bı alańynda kóńil kóterip júrgen 37 klıent bolǵan. Olar stól basynda áleýmettik qashyqtyqty saqtamaı, bas sanıtarııa dárigeriniń qaýlysyn buzǵan.
Sonymen qatar tekseris barysynda Beısekov kóshesinde avtokólik jóndeýmen aınalysyp jatqan Tehnıkalyq qyzmet kórsetý ornynyń ákimshiligi tarapynan tártip buzý faktisi tirkeldi.
27 shilde kúni qatań karantın sharalarynyń buzylýyna jol bermeý maqsatynda aýdandyq basqarma qyzmetkerleri men aýdan ákimdiginiń ókilderi jáne Taýarlar men kórsetiletin qyzmetterdiń sapasy men qaýipsizdigin baqylaý basqarmasy ókilderimen birlesip Mustafın kóshesindegi qonaqúı kesheniniń jumysy jalǵasyp jatqanyn anyqtady. Tekserý barysynda kafede 12 adam bolǵan.
Jınalǵan materıaldar QR ÁQBK 425-baby boıynsha ákimshilik jaýapqa tartý úshin Taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi.
Nur-Sultan qalasynyń Polıtsııa departamenti azamattardy qoǵamdyq oryndardaǵy erejege jaýapkershilikpen qarap, sanıtarııa talaptaryn oryndaýǵa shaqyrady. Koronavırýs taralyp ketpes úshin polıtseıler azamattarǵa karantın tártibin saqtaý men jeke qorǵanys quraldaryn taǵýdyń mańyzdylyǵy týraly túsindirme jumystaryn júrgizip jatyr.
