Nur-Sultanda «Digital Bridge» halyqaralyq tehnologııalyq forýmy ótedi
Jetekshi IT-mamandar men tehnologııalyq kásipkerler tsıfrlyq damý salasynda ınnovatsııalyq sheshimder men tájirıbe almasý úshin biryńǵaı dıalog alańynda jınalady.
Bıyl «Digital Bridge» forýmy elimizdiń jas IT-mamandaryn qoldaý úshin Qazaqstan Prezıdenti Q.Toqaevtyń bastamasymen ótkiziledi.
«Digital Bridge» forýmynyń basty maqsaty – Qazaqstannyń ınnovatsııalyq ekojúıesine qatysýshylar arasynda dıalog alańyn qurý jáne Shanhaı Yntymaqtastyq Uıymyna (ShYU) qatysýshy elder arasynda qazirgi zamanǵy tehnoparkter pýlyn qalyptastyrý.
«Bıyl Digital Bridge Qazaqstandaǵy tsıfrlyq ekojúıege qatysty barlyq is-sharalardy bir qolshatyrdyń astyna jınaǵan forým bolmaq. Biz Digital Bridge bıznes, startaptar, memleket jáne osy saladaǵy máselelerdi sheshýge, tsıfrlyq ıdeıalardy ilgeriletýge, naqty paıda ákeletin jobalardy iske asyrýǵa nıetti aýdıtorııalardy biriktiretin kópirge aınalǵanyn qalaımyz», - dep habarlady «Zerde» UIH» AQ Basqarma tóraǵasynyń orynbasary Pavel Koktyshev.
Forým alańyndaǵy basty shara Next Tech Entrepreneur Forum strategııalyq sessııasy bolmaq. Qatysýshylar úshin túrli taqyryptarda ashyq talqylaýlar uıymdastyrylady: bolashaqtyń bilimi, venchýrlik qarjylandyrý, bıznes-ınkýbatsııalaý, tsıfrlyq medıa. Munda qatysýshylar arasynda B2B kezdesýler ótkizý múmkindikteri bolady.
«Biz bıznes-ortaǵa úlken nazar aýdaramyz. Jeke alańda startaptar, ınvestorlar, kásipkerler, AT-kompanııalary, mamandar men medıa ókilderi bir-birlerimen kezdesip, beıresmı jaǵdaıda, «galstýksiz», naqty taqyryptardy talqylaı alatyn alańdy uıymdastyramyz», - dep tolyqtyrdy Pavel Koktyshev.
Forým kúnderi dástúrli túrde jyl saıynǵy Qazaqstannyń ІT-ındýstrııasyn damytýǵa qosqan úlesi úshin beriletin Astana Hub Awards marapaty ótedi. Sondaı-aq, Astana Hub Battle jarysynda tehnologııalyq startaptar óz múmkindikterin kórsetedi.
«Digital Bridge» aıasynda Astana IT University resmı ashylýy, alem baǵdarlamalaý mektebiniń tanystyrylymy ótedi, sondaı-aq «Digital HQO» servısteri kórsetiledi. Sonymen qatar, forým sheńberinde bes CDO qatysýymen «Tsıfrlandyrý máseleleri boıynsha ashyq talqylaý» sessııasy jáne ShYU halyqaralyq tehnoparkteriniń dóńgelek ústeli ótedi.
Іs-sharany Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrligi «Zerde» Ulttyq ınfokommýnıkatsııalyq holdıngi» AQ jáne Astana Hub Halyqaralyq IT-startaptar tehnoparkiniń qatysýymen uıymdastyryp otyr. Forým «Qazaqtelekom» AQ, ERG jáne BTS Digital qoldaýymen ótkiziledi.
Forým saıtynda qatysýshylardy jáne BAQ ókilderin tirkeý ashyq.
