Nur-Sultanda demalys kúnderi azyq-túlik dúkenderi ǵana jumys isteıdi
NUR-SULTAN. QazAqparat - Maýsymnyń 20-21 kúnderi elordada tek úıdiń aýlasyndaǵy azyq-túlik dúkenderi ǵana jumys isteıtin bolady, dep habarlaıdy QazAqparat tilshisi.
Qala ákimdiginiń málimetinshe, jumys ýaqyty saǵat 10.00-den 17.00-ge deıin. Buǵan qosa demalys kúnderi barlyq OSO, saýda úıleri, jelilik dúkender, jabyq azyq-túlik jáne azyq-túlik emes bazalarlar men dúkenderdiń jumysy toqtatylady.
«Qazir qalada indettiń eki – otbasylyq jáne ujymdyq oshaǵy baryn eskerip, elordada «úıdegi demalysty» engizý týraly sheshim qabyldandy. Búginde bizge, dárigerlerge indetti juqtyrý qarqynyn tómenderý jáne tizbekti joıý kerek. Áıtpese ınfektsııa údep barady. Qala tirligin qamtamasyz etetin kásiporyndar men úıdegi azyq-túlik dúkenderi ǵana jumys isteıdi. Tipti, bazarlar da jabylady. Qala turǵyndary senbige deıin qajetti azyq-túlik satyp alýy kerek. Alaıda dúrbeleń týdyrmaǵan jón, sebebi ár úıdiń aýlasynda azyq-túlik dúkenderi bar. Adamdar bul kúnderi úılerinde otyrýy tıis. Asa qajettilik bolmasa úıden shyqpaý kerek», – dedi qalanyń bas sanıtarlyq dárigeri Janna Pirálıeva.
Budan bólek, 20-21 maýsymda dárihanalar men kóshedegi dámhanalar formatyndaǵy ashyq aspan astyndaǵy qoǵamdyq tamaqtaný oryndaryna jumys isteýge ruqsat beriledi. Olar sanıtarlyq talaptardy qatań saqtaýy tıis.
Aıta keteıik, búgin QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótti. Onda Nur-Sultan, Almaty, Qaragandy, Shymkent, Pavlodar, Ekibastuz qalalary boıynsha birqatar shekteýler sharalary qabyldanǵan edi.
