Nur-Sultanda COVID-19 juqtyrǵandardyń 48% − jumys isteıtinder
NUR-SULTAN. QazAqparat – Nur-Sultan qalasynyń bas memlekettik sanıtarlyq dárigeri Sarhat Beısenova koronavırýs ınfektsııasyn juqtyrǵan naýqastardyń jas mólsherin aıtyp berdi, dep habarlaıdy QazAqparat tilshisi.
«Burynǵydaı kóbinese 30-39 jastaǵy adamdar basym aýyrady, olar 24,8% quraıdy. 50 jastan asqan adamdar – 23,5 % bolsa, balalardyń jalpy syrqattanýshylyqtaǵy úlesi – 14,9% quraıdy. Jumys isteıtinder aýrý juqtyrýǵa anaǵurlym beıim bolady, olar jalpy syrqattanýshylyqtyń 48% alady. Bul ujymdarda epıdemııaǵa qarsy is-sharalardyń saqtalmaıtynyn kýálandyrady», - dedi S. Beısenova elorda ákimdiginde ótken onlaın brıfıngte.
Qazirgi ýaqytta tirkelgen 857 úı oshaǵy bar, onda naýqastarmen qarym qatynasta bolǵan 2 161 adam medıtsınalyq baqylaýda.
Aıta keteıik, elordada COVID-19 aýrýy qańtar aıymen salystyrǵanda 33,8%-ǵa tómendedi. Táýligine shamamen 68 ınfektsııa jaǵdaıy tirkeledi, onyń ishinde 37 jaǵdaı sımptomdy, 31-i sımptomsyz túrde.
