Nur-Sultanda COVID-19 juqtyrǵan bir naýqastyń jaǵdaıy aýyr
NUR-SULTAN. QazAqparat - Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova elordada koronavırýs ınfektsııasymen tirkelgen sońǵy úsh naýqas týraly aıtyp berdi, dep habarlaıdy QazAqparat.
Onyń aıtýynsha, bir naýqas 21 naýryz kúni keshke anyqtaldy. Ol koronavırýs juqtyrǵan adammen jaqyn baılanysta bolǵan adam retinde tekserýge alynǵan edi.
«22 naýryz kúni taǵy eki jaǵdaı tirkeldi. Onyń bireýi - ókpe qabynýy kúdigimen statsıonardaǵy boksta jatqan. Dıagnostıkalaý kezinde koronavırýs ınfektsııasy anyqtaldy. Qazirgi ýaqytta onyń dene qyzýy joq, biraq jaǵdaıy aýyr. Eki jaqty pnevmonııa, 1-deńgeıdegi tynys jetipeýshiligi bar. Pánaralyq top konsılıýmy taǵaıyndady», - dedi basqarma basshysy «Habar 24» telearnasynda ótken brıfıngte.
«Qalǵan 30 naýqastyń jaǵdaıy qanaǵattanarlyq, dene qyzýy shekti mejede. Koronavırýstyq ınfektsııa boıynsha hattamaǵa sáıkes em-dom alyp jatyr», - dedi S. Qısyqova.
Aıta keteıik, Qazaqstan Respýblıkasy aýmaǵynda koronavırýs ınfektsııasyn juqtyrǵan jalpy 56 naýqas tirkeldi. Nursultan qalasynda 31 adamda koronavırýs ınfektsııasy anyqtaldy. Almaty qalasynda - 22 adam, Qaraǵandy qalasynda - 2, Almaty oblysynda 1 adam.
Buǵan deıin basqarma basshysy elordada Nursultan Nazarbaev atyndaǵy áýejaıǵa kelgen 600-ge jýyq jolaýshynyń tekserilip jatqanyn habarlady.
