Nur-Sultanda COVID-19-ǵa qarsy ekpe alǵysy keletinder qatary kúrt artty
NUR-SULTAN. QazAqparat – Elorda turǵyndary koronavırýsqa qarsy vaktsına alý úshin bastapqy medıtsınalyq sanıtarlyq kómek (BMSK) mekemelerinde ornalasqan egý pýnktterinde, sondaı-aq saýda ortalyqtary men qalanyń saýda úılerinde tańerteńnen bastap kezekte tur.
Bir táýlik ishinde Nur-Sultanda ekpe alǵysy keletinder sany eki eseden astam ósti, dep habarlaıdy elorda ákimdiginiń resmı saıty.
Elordadaǵy koronavırýsqa qarsy vaktsınatsııa pýnktterinde jurt kezekke turýda. Mundaı jaǵdaı qala emhanalarynda da, iri saýda ortalyqtarynda da baıqalady. Otbasylarymen kelip jatqandar da bar. Osylaısha ózin de, jaqyndaryn da qaýipti indetten qorǵaı alady.
Máselen, 25 maýsymdaǵy málimet boıynsha Nur-Sultanda vaktsınanyń birinshi komponentin 195,7 myń adam aldy. Al bir táýlik ishinde vaktsınatsııalanǵandardyń sany eki eseden astam ósti.
«Biz otbasymyzben vaktsına alǵanymyzǵa biraz ýaqyt boldy. Vaktsınatsııa mindetti bolýy kerek dep esepteımiz, áıtpese pandemııany eshqashan jeńe almaımyz. Sol sebepti vaktsına alýdan qoryqpaýǵa jáne qaıta ózin qorǵaýǵa shaqyramyz. Kez-kelgen saýatty adam vaktsına alýy kerek, bul adam densaýlyǵy men ómirin saqtaý úshin qajet. Vaktsınatsııa ujymdyq ımmýnıtetti qalyptastyrýǵa jáne karantınge deıingi qalypty ómirge oralýǵa kómektesedi», - dep atap ótti elorda turǵyndary.
Qala turǵyndary arasynda «Delta» shtammy paıda bolǵannan keıin vaktsına alý sheshimin qabyldaǵandary da bar:
«Aýyryp jumysynan qalyp, densaýlyǵyna qaýip tóndirýdi eshkim qalamaıdy. Qazir vırýstyń qaýipti jańa shtamdary paıda boldy. Bul vaktsına olardy jeńýge kómektesedi. Al juqtyrǵan jaǵdaıda ońaı ótkerýge áser etedi».
Eske sala keteıik, elorda ákimi Altaı Kólginov vaktsına saldyrǵandar arasynda eki bólmeli páterdiń utys oıyny ótetinin habarlaǵan bolatyn. Oǵan vaktsınanyń birinshi komponentin 25 maýsym men 31 tamyz aralyǵynda alǵan azamattar qatysa alady.
Sondaı-aq, elorda kásipkerleri qala turǵyndaryn yntalandyrý úshin vaktsına alǵandar arasynda baǵaly syılyqtar utysyn ótkizip jatyr.
Mysaly, «Azııa Park», «Mega Silk Way», «Saryarqa», «Abý-Dabı Plaza», «Kerýen», «Eýrazııa» SOO-larynda turmystyq jáne kompıýterlik tehnıka sekildi baǵaly syılyqtar oınatylyp, jeńildik kýpondary syıǵa beriledi. Bul aktsııaǵa «Mechta» elektronıka jáne turmystyq tehnıka dúkenderiniń saýda jelisi de qosylady.
