Nur-Sultanda COVID-19 boıynsha jedel járdem shaqyrtý kóbeıdi
NUR-SULTAN. QazAqparat - Elordada KVI boıynsha jedel medıtsınalyq járdem stantsııasyna túsken shaqyrtýlar men ótinishter sany artty, Koronavırýsqa baılanysty kúnine 300-ge jýyq qońyraý túsedi, dep habarlaıdy QazAqparat qala ákimdiginiń resmı saıtyna silteme jasap.
«Elordada jedel járdem qyzmetine júkteme taǵy da artty. Qaladaǵy kúrdeli epıdemıologııalyq jaǵdaıǵa baılanysty jedel medıtsınalyq járdem stantsııasyna kúnine 3-3,5 myńǵa deıin ótinish kelip túsedi», - delingen Qoǵamdyq densaýlyq saqtaý basqarmasynyń habarlamasynda.
Qalalyq jedel medıtsınalyq járdem qyzmeti dıspetcherlik bóliminiń meńgerýshisi Bota Sádethannyń aıtýynsha, KVI, JRVI jáne pnevmonııa boıynsha habarlasatyndar sany artty.
«Ótken jylǵy osy kezeńmen salystyrǵanda qazir jedel járdemge habarlasatyndar sany 40%-ǵa deıin ósti. Sońǵy aptanyń ózinde KVI-ǵa baılanysty qońyraýlar sany 1,5 esege, ıaǵnı táýligine 179-dan 300-ge deıin ósti», - deıdi Bota Sádethan.
Esterińizge sala keteıik, ótken jyly jazǵy kezeńde jedel járdem brıgadalary 18 myńnan astam shaqyrýǵa qyzmet kórsetken, olardyń basym bóligi koronavırýstyq ınfektsııa boıynsha júgingen. Dıspetcherler KVI máselelerine qatysty 9,5 myń ótinish boıynsha keńes berdi.
Qazirgi ýaqytta elordada koronavırýs indetiniń óskeni baıqalady. Ótken táýlikte 219 adam juqpaly aýrýlar aýrýhanasyna jatqyzyldy.
KVI emdeý úshin 14 statsıonar jumyldyryldy. Qala boıynsha barlyǵy 1 600-den astam patsıent statsıonarlyq emdelýde, onyń ishinde 1 400-den astamy KVI-men, qalǵany – pnevmonııa. Tósek júktemesi 75%-dy quraıdy. Reanımatsııa bólimshesinde 104 patsıent bar, onyń ishinde aýyr dárejede – 48 adam, asa aýyr dárejede – 56 naýqas.
