Nur-Sultanda «Burqasyn-2021» qysqy festıvali ótti
Atalǵan báseke qysqy sporttyń 8 túrinen ótti. Naqtyraq aıtqanda, shańǵy jarysy, gir tasyn kóterý, qol kúresi, pımaly hokkeı, qarmen nysanany dáldep atý, avtosport, motosport jáne qysqy fýtbol.
Іs-sharaǵa Nur-Sultan qalasy ákiminiń orynbasary Baqtııar Máken men QR Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy Serik Sápıev qatysyp, sportshylarǵa sáttilik tiledi.
«Bul «Burqasyn-2021» qysqy festıvali dástúrli túrde jyl saıyn uıymdastyrylady. Kórip otyrǵanymyzdaı, saıysqa kishkentaı baladan aǵa býynǵa deıin qatysyp jatyr. Qysqy oıyndarǵa qatysyp, belsendilik tanytyp jatqan sportshylarǵa úlken alǵys aıtamyz. Bizdiń maqsatymyz – salaýatty ómir saltyn jáne sportty nasıhattaý. Barshańyzǵa sáttilik tileımin», – dedi B.Máken.
Sonymen qatar, qysqy festıvalge qatysqan elorda turǵyndary men sportsúıer qaýymdy Olımpıada chempıony Serik Sápıev Mádenıet jáne sport mınıstrliginiń atynan quttyqtap, sharany uıymdastyrǵan Nur-Sultan qalasynyń ákimdigine alǵys bildirdi.
Shańǵy jarysyna 4 jastaǵy búldirshinnen 50 jasqa deıingi sportshylar qatysty. Sondaı-aq osy sport túrinen saıysqa túsken jas sarbazdar men áskerı qyzmetshiler salaýatty ómir saltyn ustanyp, úlgi kórsetti.
«Burqasyn-2021» festıvaline qatysqandaǵy maqsatymyz – jastar men jasóspirimderdi sportpen aınalysýǵa nasıhattaý, jastarǵa úlgi bolý. Biz úshin qazirgi qoǵamdaǵy jastardyń densaýlyǵy mańyzdy. Sol sebepti bos ýaqytyn tıimdi paıdalansyn degen oımen «Jas sarbaz» qoǵamdyq birlestiginiń atynan 30-ǵa jýyq jasóspirimdi qatystyryp otyrmyz. Jeńiske jetemiz degen úmitimiz bar», – dedi «Jas sarbaz» jasóspirimder áskerı-patrıottyq qozǵalysy Nur-Sultan qalalyq fılıalynyń tóraǵasy Ashat Nalshybek.