Nur-Sultanda búgin koronavırýs juqtyrǵandar jaıly ne bilemiz
NUR-SULTAN. QazAqparat - 12 sáýirde elordada koronavırýs indetin juqtyrǵan 7 adam tirkeldi. Onyń úsheýi koronavırýs juqtyrǵandarmen jaqyn qarym-qatynasta bolǵan, buryn oqshaýlanǵan, dep habarlaıdy QazAqparat.
Taǵy 4 jaǵdaı - eki jaqty pnevmonııa, tynys alý jetispeýshiliginiń belgilerimen statsıonarlyq emdeýde bolǵan patsıentter.
Esterińizge sala keteıik, buǵan deıin elordada pnevmonııa jáne JRVI-men aýyryp jatqan naýqastar úshin arnaıy korpýstar ashylǵan. Ortalyq jol aýrýhanasynyń terapııalyq korpýsy pnevmonııasy bar patsıentterdi ǵana qabyldaıdy. Blokta oqshaýlanǵan qabyldaý-dıagnostıkalyq bólimshe uıymdastyryldy.
Al №2 qalalyq emhana bazasynda JRVI belgileri bar patsıentterdi qabyldaý úshin observatsııalyq emhana uıymdastyryldy. JRVI belgileri bar naýqastardy tek №2 qalalyq emhana qabyldaıdy.
Bul bloktardyń ashylýy ınfektsııanyń taralý qaýpin tómendetýge jáne ýaqytyly medıtsınalyq kómek kórsetýge múmkindik berdi.
Eske sala keteıik, elordada koronavırýs indetin juqtyrǵandardyń sany - 238 adam, onyń 37-si emdelip shyqty.
