Nur-Sultanda boıjetken «eles» páterlerdi jalǵa berip kelgen
NUR-SULTAN. QazAqparat – Nur-Sultanda «eles» páterlerdi jalǵa berý kúdigimen 25 jastaǵy qyz ustaldy, dep habarlaıdy QazAqparat tilshisi.
«Ustalǵan 25 jastaǵy qyz paıdakúndemdik maqsatta jeke jarnamalar saıtyna páterdiń jalǵa beriletindigi týraly feık aqparat ornalastyrǵan. Ol jarnama tartymdy bolýy úshin ózge habarlandyrýlardaǵy páterlerdiń sýretin aldyn ala kóshirip alǵan. Buǵan qosa, ol jaldaý qunyn tómen kórsetken. Kelissózdi telefon arqyly júrgizip, páterdi jalǵa alýshynyń shyn nıetine kóz jetkizgen soń elektrondy ámııanǵa aldyn ala tólem aýdarýdy usynǵan. Zardap shegýshi aqsha aýdarǵannan keıin alaıaq habarlandyrýdy óshirip, telefonyn ajyratyp qoıǵan», - delingen Nur-Sultan qalalyq Polıtsııa departamenti taratqan aqparatta.
Vedomstvo málimetinshe, ustalǵan qyzǵa qatysty QR Qylmystyq kodeksiniń 190-babymen sotqa deıingi tergeý júrgizilip jatyr. Qazirgi ýaqytta 13 zardap shegýshi belgili bolyp otyr. Biraq, olardyń sany munan da kóp bolýy múmkin. Jalpy keltirilgen zalal 500 myń teńgeni quraıdy.
«Onlaın qyzmet pen saýda-sattyqtyń damýyna oraı ınternet-alaıaqtyq sany da arta túsýde. Tek osy jyldyń qańtar aıynda ǵana kıberalaıaqtyq boıynsha 290 shaǵym tústi. Nur-Sultan qalalyq Polıtsııa departamenti shyn habarlandyrýdy jalǵan jarnamadan ajyratý úshin usynylǵan qyzmetter men taýarlardyń shyn ekendigin tekserip alýdy usynady. Aldyn ala tólem jibermeý qajet jáne qyzmet tólemin onyń shynaıy ekendigine kóz jetkizgen soń ǵana jasaǵan durys», - dedi polıtsııadan.
