Nur-Sultanda blokpostarda jumys istegen dárigerler, polıtseıler men eriktiler marapattaldy
NUR-SULTAN. QazAqparat - Búgin Qaraǵandy tas jolyndaǵy «Jibek joly» blokpostynda Nur-Sultannyń Polıtsııa departamentiniń basshysy Erjan Sádenov vırýspen kúresýde aldyńǵy shekte bolyp, onyń taralýyna jol bermeý úshin belsendi jumys istegen dárigerler, polıtseıler men volonterlerdi marapattady.
Dárigerler, eriktiler men polıtseıler QR ІІM mınıstri Erlan Turǵymbaev, elorda ákimi Altaı Kólginov jáne Nur-Sultan qalasy Polıtsııa departamentiniń basshysy Erjan Sádenovtyń atynan gramota jáne alǵys hattarmen marapattaldy, dep habarlaıdy elorda ákimdiginiń resmı saıtyna silteme jasap.
«Dárigerler, polıtseıler men volonterler birigip, indetpen kúrese otyryp, tezirek qalypty ómirimizge oralýǵa kómektesti. Polıtseıler men eriktilerge eren eńbegi úshin alǵys aıtamyz. Bizdiń azamattarymyzdyń densaýlyǵy sizderdiń jumystaryńyzǵa baılanysty boldy. Sizder naǵyz janashyrlyq pen qamqorlyqtyń jarqyn úlgisi kórsettińizder», - dedi Erjan Sádenov.
Eriktiler polıtseılermen birge reıdter men profılaktıkalyq sharalarǵa qatysyp, túsindirý jumystaryn júrgizdi. Ýchaskelik ınspektorlarmen birge azamattarmen kezdesip, olarǵa qaýipsizdik sharalaryn túsindirdi. Dárigerler táýlik boıy adamdardyń ómirimen arpalysyp, ınfektsııamen aldyńǵy shepte kúresti. Karantın kezinde naǵyz erliktiń eren úlgisin kórsetken polıtseıler az emes. Onyń ishinde blokpostarda júkti áıelderdi alyp perzenthanalarǵa, túrli jaraqattarmen kelgen naýqastardy aýrýhanalarǵa jetkizgen polıtseıler bar. Buǵan qosa, Polıtsııa departamenti karantın rejımi aıaqtalmady, epıdemııa joıylǵan joq. Sondyqtan maska kıip, sanıtarlyq-epıdemıologııalyq rejımdi qatań saqtaý keregin eskertti.
