Nur-Sultanda bıyl uzaqqa sozylǵan 57 turǵyn úıdiń qurylysy aıaqtalady
NUR-SULTAN. QazAqparat - Nur-Sultan qalasynyń ákimi Altaı Kólginov Instagram paraqshasynda problemaly «Shyǵys» kóppáterli turǵyn úı kesheniniń qurylysy boıynsha qandaı jumystar júrgizilip jatqanyn túsindirip berdi, dep habarlaıdy QazAqparat qalalyq ákimdiktiń baspasóz qyzmetine silteme jasap.
«Qurylysy uzaqqa sozylǵan nysandardy aıaqtaý boıynsha júıeli jumys júrip jatyr.
Qalanyń eń problemaly, qurylysy uzaqqa sozylǵan — «Shyǵys» turǵyn úı kesheni birneshe toptan turady. Úleskerlerdiń jalpy sany — 2 myńnan astam otbasy. «Shyǵys» turǵyn úı toby boıynsha aýqymdy jumys atqaryldy: úılerdiń qurylysy qaıta jandanyp, tehnıkalyq aýdıt júrgizildi, qarjy bólindi, bloktardyń merdigerleri tolyqtaı anyqtaldy.
Mysaly, 1a jáne 1v bloktarynda qasbettik jumystar júrgizildi, terezeler men lıftiler ornatyldy. Іshki ınjenerlik jelilerdi ornatý boıynsha jumystar aıaqtaldy. Sondaı-aq jylý toraptary men sorǵy stantsııalaryn montajdaý boıynsha jumystar júrgizildi.
2A jáne 2V bloktarynda úıdiń jaqtaýy kóterildi. Turǵyn úı kesheniniń shatyry jóndeldi, qazir terezeler men lıftilerdi ornatý jumysy júrip jatyr. Qazirgi ýaqytta atalǵan bloktardyń qurylysy aıaqtalýǵa jaqyn, ınjenerlik jelilerdi qosý jumystary júrgizilýde, «Shyǵys» 2a blogynda abattandyrý jumystary bastaldy.
Sol sııaqty 3A jáne 3B bloktarynda da osyǵan uqsas jumystar júrgizildi. Sondaı-aq, ınjenerlik jelilerdi qosý jumystary júrip jatyr, abattandyrý jumystary bastaldy.
«Shyǵys» 4 boıynsha (1 kezek) qańqany turǵyzý, qalaý jumystary aıaqtaldy. Qasbet, ishki ınjenerlik jeliler, terezeler men vıtrajdardy montajdaý, shatyrdy ornatý boıynsha jumystar júrgizilýde.
Qurylys jumysyn aıaqtaýdy ári turǵyn úı kesheniniń bloktaryn paıdalanýǵa berýdi bıylǵa josparlap otyrmyz.
Eki jyl ishinde (2019 jyldyń jazynan bastap) problemaly nysandar sany 2 eseden astam azaıdy. Bıyl 18 nysandy qamtıtyn 57 úıdiń qurylysyn aıaqtaýdy josparlap otyrmyz – kópten kútken páteriniń kiltin 7 myńnan astam úlesker alady. Mysaly, osy jyldyń birinshi jartyjyldyǵynda 21 problemaly úıdiń qurylysy aıaqtaldy. Ár nysan boıynsha qadamdyq is-sharalar jospary jasaldy», - dep jazdy elorda ákimi.
