Nur-Sultanda bıyl 667 qylmys beınekameranyń kómegimen ashylǵan
NUR-SULTAN. QazAqparat – Astanada jyl basynan beri beınekameralardyń kómegimen 667 qylmys ashyldy. Bul týraly Nur-Sultan qalalyq polıtsııa departamenti jedel basqarý ortalyǵynyń bastyǵy, polıtsııa podpolkovnıgi Qaırat Raýshanov málim etti, dep habarlaıdy QazAqparat.
«Jyl basynan beri beınekameralardyń kómegimen 667 qylmys jáne 8 myńnan astam ákimshilik quqyq buzýshylyq áshkerelendi. Onyń ishindi kishigirim buzaqylyq, qoǵamdyq orynda ishimdik ishý, jol júrý erejesin buzý syndy quqyq buzýshylyqtar bar», - dedi Qaırat Raýshanov BAQ ókilderine arnalǵan brıfıng barysynda.
Onyń atap ótýinshe, jyl saıyn beınebaqylaý júıelerin, onyń ishinde memlekettik-jekeshelik áriptestik aıasynda ózara is-qımyl baǵdarlamalaryn odan ári damytý josparly túrde júrgizilip keledi.
Máselen, 2021 jyly «Ashyq platformaǵa kóshe otyryp, JBO beınebaqylaý júıesin jańǵyrtý jobasy engizildi.
Osy jobany iske asyrý barysynda jańa serverlik jabdyq ornatyldy.
Jedel basqarý ortalyǵy beınebaqylaý operatorlarynyń jumys orny jańartyldy.
«Qazirgi ýaqytta elordalyq polıtsııa departamenti 28 myńnan astam baqylaý kamerasyn paıdalanyp otyr. Olardyń negizgi bóligi memlekettik-jekeshelik áriptestik aıasynda ornatylǵan. Mysaly, «Sergek» aqparattyq-baǵdarlamalyq kesheniniń 13 myń kamerasy, memlekettik bilim berý mekemelerinde ornatylǵan 4 myńnan astam kamera, turǵyn úılerdiń kireberisterindegi 5,5 myń kamera bar», - dedi ortalyq basshysy.
