Nur-Sultanda bıyl 16 mektep salynady
Bul jaıynda búgin qala ákimi Altaı Kólginov Instagram paraqshasynda jazdy.
«Tańerteńgilik qalany aralaý barysynda birqatar mekteptiń qurylysymen tanystym. Mysaly, Esil aýdanynda ornalasqan mektep (Uly Dala dańǵyly men №39 kósheniń qıylysy) eki aýysymda 2400 oqýshyny oqyta alady. Sonshama oryn Almaty aýdanyndaǵy mektepte (Q.Sátpaev jáne J. Nájimedenov kósheleriniń qıylysy) qurylady. Tehnıka men adamdardy jumyldyrýdy tapsyrdym. Oqý oryndaryn barlyq qajetti jabdyqtarmen qamtyp, mektepterge kirme joldardy oılastyrý, sondaı-aq mektep aýmaǵyn abattandyrý men kógaldandyrýǵa erekshe nazar aýdarý qajet. Ekinshi mektep boıynsha da ınjenerlik jelilerge qosylý máselesin sheshýdi tapsyrdym» dep jazady shahar basshysy.
Ákimniń sózine sensek, bıyl barlyǵy 16 mektep salý josparlanyp otyr.
«Oqý oryndaryn salý kezinde iri mektepterge kóshemiz. Osy sharalardyń arqasynda bıyl ǵana 40 myńnan astam oqýshy orny qurylady. Demek, 2020 jylmen salystyrǵanda oqýshy oryndarynyń sany 2 eseden astam, al 2019 jylǵa qaraǵanda 4 ese ulǵaıady. Mysaly, ótken jyly 11 mektep salyndy. Bul úsh aýysymmen oqytatyn mektepter sanyn 8 – den 4-ke deıin, al tyǵyzdalǵan rejımi bar mektepter sanyn 22-den 14-ke deıin qysqartýǵa múmkindik berdi. Sonymen qatar, birqatar mektepter jylytý qazandyǵynan ortalyqqa aýystyryldy. Bul jyl saıyn 100 mln teńgege deıin qarajat únemdeýge múmkindik beredi. Mektep qurylysyna da jeke ınvestıtsııa tartamyz. Investıtsııalyq keńesterde 30-dan astam jeke menshik mekteptiń qurylysy qoldandy» deıdi Altaı Kólginov.
Sonymen qatar, keshendi jospar aıasynda 5 jylda 50-ge jýyq memlekettik mektep salý josparlanǵan.
Onyń aıtýynsha, qoldanystaǵy oqý oryndaryna tıisti nazar aýdarý qajet. Ótken jyly 26 bilim nysany (mektepter, balabaqshalar, kolledjder) jóndeldi.
Osy jyly da bul jumys júıeli deńgeıde jalǵasa bermek.
