Nur-Sultanda bıyl 100 myńǵa jýyq adamnyń úıine gaz keledi

NUR-SULTAN. QazAqparat – QR Energetıka mınıstri Bolat Aqsholaqov Nur-Sultan qalasy men Qaraǵandy oblysyn gazben qamtý jumystaryn baıandady, dep habarlaıdy QazAqparat tilshisi.

«Ózderińiz biletindeı, «Saryarqa» magıstraldi gaz qubyrynyń I kezeńiniń qurylysy 2019 jyly aıaqtaldy. Qazir Nur-Sultan qalasy men Qaraǵandy oblysynyń ákimdikteri gaz taratý jelilerin júrgizip jatyr», - dedi Bolat Aqsholaqov búgingi Úkimet otyrysynda.

Nur-Sultan qalasy boıynsha birinshi jáne ekinshi kezektiń eki iske qosý kesheniniń qurylysy aıaqtalyp, «Kóktal-1,2», «Agrogorodok», «Jeleznodorojnyı», «Promyshlennyı», «Kúıgenjar», «Mıchýrıno», «Internatsıonalnyı» t/a, Ońtústik-Shyǵys oń jáne sol jaǵynda, Potanın kóshesi aýdanyndaǵy qalanyń eski bóligine gaz berilgen.

Nátıjesinde 14 myńnan astam abonent nemese 191 myńnan astam adam tabıǵı gazǵa qol jetkizdi.

«Bıyl respýblıkalyq bıýdjetten shamamen 92 myń adam turatyn Telman, Prıgorodnyı, Femılı Vılladj, Garden Vılladj, Ilınka, Qaraótkel, Shubar, Óndiris, Kırpıchnyı turǵyn alaptaryna jetkizý jelilerin salýdy kózdeıtin 2,3-kezektiń qurylysyna 23 mlrd teńge qarjy bólindi. Sonymen qatar Nur-Sultan ákimdigi gaz taratý jelilerin salý jobasyn qatar ázirlep jatyr», - dedi B. Aqsholaqov.

Qaraǵandy oblysyn gazdandyrý boıynsha Qaraǵandy oblysynyń ákimdigi Qaraǵandy, Jezqazǵan, Temirtaý qalalarynyń birinshi iske qosý keshenin aıaqtady.

Nátıjesinde shamamen 2,7 myń abonent nemese 8,1 myń adam tabıǵı gazǵa qol jetkizdi.

Sondaı-aq, ákimdik Shet, Buqar jyraý aýdandary men Jáırem kentin gazdandyrý jobasyn daıyndap jatyr.

Buǵan deıin Energetıka mınıstri 2022 jyly halyqtyń 58,43% paıyzy gazben qamtylatynyn aıtqan edi.

Bıyl 133 jobany iske asyrýǵa 96 mlrd teńge qarastyryldy, bul 146 myń adamdy nemese 93 eldi mekendi gazben qamtamasyz etýge múmkindik beredi.