Nur-Sultanda bıyl 10 myń áleýmettik páter salynady

NUR-SULTAN. QazAqparat - Nur-Sultan qalasynyń ákimi Altaı Kólginov bıyl salynatyn áleýmettik baspanalar jaıly málim etti, dep habarlaıdy QazAqparat.

«Baspana máselesi qala turǵyndary úshin qashanda ózekti bolyp qala bermek. Turǵyn úı qoljetimdirek bolýy úshin birneshe baǵyt boıynsha jumys júrip jatyr. Olar – jeńildikpen beriletin qoljetimdi turǵyn úı salý, turǵyn úı keshenderin jóndeý, apatty jaǵdaıdaǵy jáne eski úılerdi buzý, qurylysy uzaqqa sozylǵan nysandardy aıaqtaý jáne basqasy.

Jeńildikpen beriletin páterler salý jumysy «Baıterek» holdınginiń enshiles uıymdary jelisi boıynsha júrip jatyr. Osy sebepti birqatar uıymnyń basshylyǵymen jınalys ótip, ózekti máseleler qarastyryldy. Osylaısha búginge deıin júrgizilgen baǵdarlamalardy ary qaraı jalǵastyramyz. Máselen, qazaqstandyq turǵyn úı baǵdarlamasy (QIK) jelisi boıynsha – medıtsınalyq jáne áleýmettik qyzmetkerlerge, pedagogterge, Polıtsııa departamenti men TJD qyzmetkerlerine, mádenıet jáne sport qaıratkerlerine arnalǵan áleýmettik turǵyn úı», - dep jazdy qala basshysy Instagram-paraqshasynda.

Altaı Kólginov ótken jyldan bastap Otbasy banki jelisi boıynsha kezekte turǵandar jastar úshin arnaıy baǵdarlama iske qosylǵanyn eske saldy.

«Turǵyn úı boıynsha jeńildetilgen áleýmettik nesıelendirý baǵdarlamasy qalamyzdyń 36 jasqa deıingi jastaryna (kúıeýiniń/áıeliniń jasy mańyzdy emes) arnalǵan.

Memleket basshysy azamattardyń qoljetimdi baspana satyp alýyna jaǵdaı jasaý máselesine erekshe nazar aýdarýdy tapsyrdy. Bıyl biz taǵy da 10 myń áleýmettik páter salýdy josparlap otyrmyz», - dep jazdy elorda ákimi.