Nur-Sultanda birneshe ret páterge urlyqqa tústi degen kúdikpen eki adam ustaldy

NUR-SULTAN. QazAqparat – Eki kúdikti qazan aıynyń sońynda elordaǵa kelip, osy ýaqytqa deıin segiz ret urlyqqa túsken. Olar qala aýmaǵyndaǵy jeke menshik sektordaǵy úılerge terezeni buzý arqyly kirip otyrǵan. Altyn buıymdar, kompıýterlik tehnıka, uıaly telefon, oıyn prıstavkasy jáne basqa da zattardy urlaǵan. Olardy jabyq bazardaǵy alyp-satarlarǵa satyp otyrǵan, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Jedel izdestirý sharalaryn júrgizý kezinde «Saryarqa» aýdanynyń polıtsııa bóliminiń qyzmetkerleri Shyǵys Qazaqstan jáne Túrkistan oblystarynyń 30 jáne 25 jastaǵy eki turǵynyn ustady. Kúdiktiler buǵan deıin urlyq jáne tonaý faktileri boıynsha birneshe ret sottalǵan bolyp shyqty. Qazirgi kezde olardyń Almaty qalasynyń aýmaǵynda jasalǵan uqsas qylmystarǵa qatysy bar-joqtyǵy anyqtalyp jatyr. Odan bólek, bir kúdikti 2021 jyldyń sáýirinde Almaty oblysynda bes ret páterge urlyqqa túskeni úshin bas bostandyǵynan aıyrylǵan.

Qazirgi kezde ustalǵandar jasaǵan qylmystaryn moıyndady, olardyń astana aýmaǵynda jasalǵan qylmystarǵa qatysy bar-joqtyǵy anyqtalýda. Kúdiktiler Polıtsııa departamentiniń ýaqytsha ustaý ızolıatoryna qamaldy, sot aldy tergeý júrip jatyr.