Nur-Sultanda birqatar aýrýhanada josparly emdeý qaıta jalǵasady
NUR-SULTAN. QazAqparat - Nur-Sultanda birqatar medıtsına mekemeleri josparly túrde emdeýge qaıta kiristi. Bul týraly elorda ákimi Altaı Kólginov Úkimet otyrysynda málimdedi, dep habarlaıdy QazAqparat qala ákimdiginiń baspasóz qyzmetine silteme jasap.
Qabyldanǵan karantın sharalary men emhanalarda ambýlatorııalyq emdeýdi kúsheıtý medıtsına mekemeleri men qyzmetkerlerine júktemeni aıtarlyqtaı azaıtty. Osylaısha, josparly emdeý №1 jáne №2 qalalyq kópsalaly balalar aýrýhanasynda, №2 qalalyq kópsalaly aýrýhanada qaıta jandandy. 3 tamyzdan bastap qaladaǵy emhanalar da josparly emdeýdi jalǵastyrady. Sonymen qatar, bir kún buryn qalalyq psıhıkalyq densaýlyq ortalyǵyndaǵy juqpaly aýrýlar statsıonarynan KVI-men aýyratyn sońǵy naýqas emdelip shyqty. Muqııat dezınfektsııadan keıin PDO burynǵy profıline sáıkes jumysyn qaıta bastaıdy. Osylaısha, 5 shildeden bastap júrgizilgen karantın sharalary men ambýlatorııalyq emdeýdi kúsheıtý nátıjesinde pnevmonııamen aýrýhanalarǵa túsken naýqastar sany eki ese – 1348-den 633-ke azaıdy. Jedel járdem stantsııasyna qońyraýlar sany 3 ese kemidi – 3 myńnan kúnine 1100-ge deıin. Onyń ishinde KVI boıynsha – kúnine 500-den 89-ǵa deıin. KVI-den emdelip shyqqan naýqastar sany 70% – 10 320 naýqastyń 7 260-i emdelip shyqty. Tósek-oryn qoryna júkteme deńgeıi 99%-dan 38%-ǵa deıin tómendedi. Covid-19-dyń tómendeý dınamıkasyn saqtaý úshin barlyq azamattar qatań sanıtarııa normalaryn: maska taǵyp, qashyqtyqty saqtaýy qajet.
