Nur-Sultanda birinshi kezeńde 100 áskerı mindetti shaqyryldy
NUR-SULTAN. QazAqparat - QR Prezıdenti Qasym-Jomart Toqaevtyń jarlyǵyna sáıkes elordada áskerı mindettiler tizimi qurylyp, áskerge shaqyryldy. Búgin elorda ákimi Altaı Kólginov pen Qorǵanys mınıstriniń birinshi orynbasary - QR QK Bas shtabynyń bastyǵy Murat Bektanov áskerı mindetti-eriktilermen kezdesti, dep habarlaıdy QazAqparat qala ákiminiń resmı saıtyna silteme jasap.
Birinshi kezeńde 100 áskerı mindetti shaqyryldy. Olardyń barlyǵy - áskerı mindetti volonterler. Qajet bolǵan jaǵdaıda olardyń sany ulǵaıtylady. Áskerı mindettiler qatarynda-belgili qazaqstandyq boksshy, «Kók týdyń jelbiregeni» ániniń avtory jáne oryndaýshysy Ibragım Eskendir de bar.
«Halyq árqashan shyǵarmashylyq adamdaryn, sportshylardy qoldaıdy. Biz bul qoldaýdy sezinemiz. Halqyma qyzmet etýge daıynmyn. Men zapastaǵy leıtenantpyn, bokspen aınalysatyndyqtan fızıkalyq turǵyda tózimdimin. Memleket basshysynyń áskerı mindettilerdi arnaýly áskerı jıynǵa shaqyrý týraly Jarlyǵyn estigende esh kúmánsiz birden elordadaǵy áskerı komıssarıatqa keldim. Medıtsınalyq tekserýden óttim, qyzmetke daıynmyn», - deıdi Ibragım Eskendir.
Qala ákimi Altaı Kólginov atap ótkendeı, áskerı mindettilerdiń negizgi mindetteri -koronavırýstyq ınfektsııanyń taralýyna jol bermeý jónindegi jedel shtab jumysyna qatysý, ótkizý-baqylaý beketterinde qyzmet atqarý, qala aýmaǵyna dezınfektsııa júrgizý, ınfektsııa oshaqtary anyqtalǵan nysandardy kúzetý.
Áskerı mindettiler tamaqpen, kıim-keshekpen, sondaı-aq eńbekaqymen tolyqtaı qamtamasyz etildi.
