Nur-Sultanda bir jylda qazaqtyń kórnekti tulǵalaryna arnap 10-ǵa jýyq eskertkish ornatyldy
NUR-SULTAN. QazAqparat - 2021 jyly el Táýelsizdiginiń 30 jyldyǵyna oraı elordada mádenıettiń jáne jalpy eldiń damýyna úlken úles qosqan belgili qazaq qaıratkerlerine arnalǵan eskertkishter jınaǵy ashyldy, sondaı-aq kún saıyn jurtty qaýipten qutqaryp qalatyn órt sóndirýshiler men medıtsına qyzmetkerleriniń qurmetine monýmentter ornatyldy, dep habarlaıdy QazAqparat.
2021 jyly Nur-Sultanda qazaq halqynyń kórnekti tulǵalaryna eskertkishter ornatyldy:
- Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev;
- Keńes Odaǵynyń eki márte Batyry Talǵat Bıgeldınov;
- Alash qaıratkerleri – Ahmet Baıtursynuly, Álıhan Bókeıhan, Mirjaqyp Dýlatuly;
- Halyq ártisi, kúıshi, kompozıtor, qazaq mýzyka mádenıetiniń asa kórnekti qaıratkeri – Dına Nurpeıisova;
- Akademık Qanysh Sátbaev;
- Qazaqstannyń tuńǵysh Olımpıada chempıony, álem chempıony Jaqsylyq Úshkempirov;
- Memleket qaıratkeri Jumabek Táshenev;
- Fılosof jáne aǵartýshy Ábý Nasyr Ál-Farabı;
- Aǵartýshy Ybyraı Altynsarın;
- Sondaı-aq, koronavırýstyq ınfektsııamen aldyńǵy shepte kúreskenderdiń erligine arnalǵan «Altyn júrek» memorıaly ornatyldy.
Bul jumys jastardyń rýhanı, patrıottyq jáne mádenı qundylyqtaryn nasıhattaý maqsatynda júrgiziledi.
Aıta ketý kerek, elordada tarıhı-mádenı mura eskertkishterin saqtaý boıynsha úlken jumystar júrgizilýde.
Elordanyń mádenıet basqarmasy baspasóz qyzmetiniń málimetinshe, qalada barlyǵy 42 tarıhı jáne mádenı eskertkish bar. Onyń ishinde úsheýiniń respýblıkalyq mańyzy bar: «Burynǵy musylman mektebi» (XIX ǵasyrda salynǵan), 1963 jyly salynǵan «Kongress holl», «Bozoq qalashyǵy», H-HІH ǵǵ.; 39 jergilikti mańyzy bar (sonyń ishinde ansamblder men keshender – 1, kıeli nysandar – 1, monýmentaldy qurylystar – 7, arheologııa eskertkishteri – 7, qala qurylysy jáne sáýlet eskertkishteri – 23).
Bógenbaı batyr, A.S. Pýshkın eskertkishterine, Chernobyl tragedııasy qurbandaryna, S.Seıfýllın murajaıynyń ǵımaratyna, «Astana» músinderine, «Jer-Ana» jáne «Astana juldyzy» monýmentterine jóndeý jumystary júrgizildi.
