Nur-Sultanda bir kúnde 8 mekeme karantın talaptaryn buzǵan

NUR-SULTAN. QazAqparat - Elordanyń monıtorıngtik toptary táýlik saıyn júzden astam kásipkerlik nysanyn tekseredi. Bir ǵana reıdtiń ózinde karantın rejımin buzǵan ondaǵan mekeme anyqtaldy. Ótken táýlikte, ıaǵnı 4 qyrkúıek kúni qalada 8 mekeme shekteý sharalaryn saqtaǵan joq, dep habarlaıdy QazAqparat qala ákimdiginiń resmı saıtyna silteme jasap.

Saryarqa aýdanynda «EL classico» oıyn klýby men «Nirvana» túngi klýby karantın talaptaryn saqtaǵan joq.

Almaty aýdanynyń tártip buzýshylar tizimine «Dostar» oıyn klýby, «Malena» jáne «Panaehalı» barlary endi.

Sondaı-aq, Esil aýdanynda ornalasqan «Tequila» jáne «Ray Bar» barlarynda belgilengen jumys rejımi eskerilmegen.

Baıqońyr aýdanyndaǵy «Panaehalı» barynda da karantın buzyldy.

Tártip buzýshylarǵa qatysty jınalǵan materıaldar ákimshilik sıpattaǵy sharalar qabyldaý úshin sanıtarlyq-epıdemıologııalyq baqylaý salasyndaǵy ýákiletti organǵa tapsyryldy.

Aıta ketý kerek, COVID-19 indetiniń tómendegenine qaramastan elorda epıdemıologııalyq jaǵdaıdy baǵalaý boıynsha «qyzyl» aımaqtan shyqqan joq. Sondyqtan qala turǵyndary men qonaqtary sanıtarlyq normalardy qatań saqtaýy kerek: maska rejımi, áleýmettik qashyqtyq, qol gıgıenasy. Azamattar ózderiniń de, ózgelerdiń de densaýlyǵyn saqtaý úshin koronavırýsqa qarsy vaktsınatsııadan ótýi kerek. Óıtkeni ımmýndaý qaýipti vırýspen kúresýdiń jalǵyz tıimdi ádisi bolyp sanalady.