Nur-Sultanda bir aıda 11 myńnan astam jol erejesin buzǵandar anyqtaldy
Bul týraly elordalyq polıtsııa departamenti basshysynyń birinshi orynbasary Baqytjan Malybaev aıtyp berdi.
«Qabyldanǵan sharalarǵa qaramastan, qala joldarynda jol-kólik oqıǵalarynan zardap shegetinder kóp. Árbir besinshi jaıaý júrginshiniń kinásinen jol apaty bolady. Jol-kólik oqıǵalary 9,7% jáne zardap shekkender 15,4%-ǵa artqan, al joldaǵy ólim 33,3%-ǵa tómendegen. Osyǵan baılanysty 19 shildeden bastap qala aýmaǵynda bir aı boıy «Qaýipsiz jol» jedel-aldyn alý is-sharasy ótedi. Onda jol qozǵalysy erejelerin óreskel buzǵandarǵa, apatqa ákep soǵatyn mas júrgizýshilerdi anyqtaýǵa jáne jolyn kesýge, jaıaý júrginshilermen jumys isteýge erekshe nazar aýdarylady», - dedi B.Malybaev elordada ótken baspasóz máslıhatynda.
Onyń aıtýynsha, jedel aldyn alý is-sharasynda jol qozǵalysy erejelerin buzýdyń 11,5 myń jaǵdaıy anyqtaldy. Mas kúıinde kólik júrgizgeni úshin – 80 adam, apatty jaǵdaı týdyrǵany úshin – 224, qarsy qozǵalys jolaǵyna shyqqany úshin – 61 jáne baǵdarshamnyń tyıym salynǵan belgisine ótkeni úshin – 315 adam ustaldy.
«Іshki ister mınıstrligi ázirlegen «Qorǵaý» júıesi arqyly ákimshilik aıyppuldaryn tólemegen qasaqana ereje buzýshylarmen belsendi kúres júrip jatyr, sondaı-aq jalǵan memlekettik tirkeý nómiri bar avtokólikti paıdalaný faktileri anyqtalýda. Osy júıe engizilgeli 4 myńnan astam júrgizýshige 282 mıllıon teńge bolatyn ákimshilik quqyqbuzýshylyqtar týraly habarlama jiberildi. Jalǵan memlekettik nómiri bar avtokólikti basqarǵany úshin 83 júrgizýshi ustaldy, 368 júrgizýshiniń kólik aıdaý quqyǵy joq jáne 159 júrgizýshi kólik aıdaý quqyǵynan aıyrylǵan, sondaı-aq saqtandyrý polısinsiz júrgen 713 júrgizýshi anyqtaldy. Kommýnaldyq turaqqa 584 avtokólik jiberildi», - dedi B. Malybaev.