Nur-Sultanda bankomattan aqsha urlady degen kúdikpen ınkassator ustaldy

NUR-SULTAN. QazAqparat - Esil aýdandyq krımınaldyq polıtsııa basqarmasynyń qyzmetkerleri jedel-izdestirý is-sharalarynyń barysynda 27 jastaǵy er adamdy ustady, dep habarlaıdy qalalyq PD baspasóz qyzmeti.

Onyń buryn qylmystyq jaýapkershilikke tartylǵany anyqtaldy.

Tergeý barysynda kúdiktiniń ınkassator bolyp jumys istep, termınaldan aqsha jınaǵany anyqtaldy. Jumystan shyqqan ol avtomattardyń biriniń kiltin bermeı ketken.

Keshki ýaqytta ol Magnum sýpermarketine kelgen. Termınalǵa jaqyndaǵan ol qurylǵyny kiltpen ashyp, 3 800 000 teńge aqshany alǵan. Sosyn baıqatpaı aqshany sómkege salyp, belgisiz jaqqa ketip qalǵan.

Urlyq boıynsha qylmystyq is qozǵalyp, tergeý amaldary júrgizilýde.