Nur-Sultanda balasy qaraýsyz túnde qydyrǵan 1500 ata-ana jazalandy
NUR-SULTAN. QazAqparat – Jyl basynan beri elordada jasóspirim balalary túngi kóńil kóteretin oryndarda júrgen 1500 ata-ana ákimshilik jaýapkershilikke tartyldy, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
Nur-Sultan qalalyq PD Jergilikti polıtsııa qyzmetiniń jasóspirimder isi jónindegi polıtsııa bólimshesiniń qyzmetkerleri 3 maýsym kúni bir táýlik ishinde ǵana túnde úıinen tys júrgen 70-ke tarta jasóspirimdi anyqtady. Olarǵa qatysty QR ÁQBjK 442-baby 2-bóligi boıynsha ákimshilik hattama toltyrylǵan.
Sonymen qatar volonterlerdiń kómegimen qaladaǵy kottedjderdiń birinde túlekterdiń mektep bitirgen kúnin toılaǵan fakti anyqtaldy. Tártip saqshylary 15 balany ata-anasyna tapsyrǵan.
«Eger balanyń bir tún úıinde bolmaǵany anyqtalsa, ata-anasyna aldymen eskertý jasalady. Jaǵdaı qaıtalansa, is Nur-Sultan qalasynyń jasóspirimder isi jónindegi mamandandyrylǵan aýdanaralyq sotyna joldanady», - dep atap ótedi Polıtsııa departamentinen.
Polıtsııa sonymen qatar bul iske qatysty balalardyń ata-analary ǵana emes, olardy keshkisin qabyldaǵan kóńil kóteretin oryn ıeleri de jazalanatynyn eskertedi. Máselen jyl basynan beri oıyn-saýyq oryndarynyń 62 ıesine qatysty QR ÁQBjK-niń 132-baby boıynsha ákimshilik hattama toltyrylǵan.
Nur-Sultan qalasynyń Polıtsııa departamenti saǵat 22.00-den tańǵy 06.00-ge deıin jasóspirimderdiń kóńil kóteretin oryndarynda bolmaýy kerektigin eskertedi.
