Nur-Sultanda balabaqshalardyń reıtıngin jasaý usynyldy
NUR-SULTAN. QazAqparat – Elordadaǵy balabaqshalar qyzmetiniń deńgeıin anyqtaý maqsatynda sapa reıtıngin jasaý ıdeıasy usynyldy, dep habarlaıdy QazAqparat tilshisi.
«Nege bizde memlekettik jáne jeke menshik balabaqshalardyń deńgeıin kórsetetin reıtıng joq? Mysaly, qaı balabaqsha barlyq talapqa saı jumys isteıdi, qaısy balabaqshada metodologııalyq jumys ońtaıly atqarylyp jatyr degen sekildi. Odan bólek, balalardyń qaýipsizdigi men olarǵa beriletin astyń sapasy da erekshe qadaǵalaýdy qajet etetin suraqtardyń biri», - dedi Nur-Sultan qalalyq Máslıhattyń hatshysy Erlan Kanalımov elorda máslıhatynyń jalpy otyrysynda.
Óz kezeginde kóterilgen máselege qatysty qalalyq Bilim basqarmasynyń basshysy Shákárim Seısenbaı óz oıyn bildirdi.
«Bul jerde reıtıngti qalaı júrgizemiz degen keri suraq týyndaıdy. ıAǵnı balabaqshalar arasyndaǵy reıtıngti bizdiń basqarma júrgizse, ol qanshalyqty durys sheshim? Meniń oıymsha, balabaqshanyń jumysyna baǵa ata-analardyń tarapynan berilgeni jón. Eger ata-analar óz baǵasyn berýge daıyn bolsa, biz óz tarapymyzdan balabaqsha jumysyn ádil ári ashyq baǵalaýdyń krıterıılerin ázirleýdi oılastyramyz», - deıdi Sh. Seısenbaı.
Bilim basqarmasy basshysynyń málimetinshe, búginde elorda balabaqshalarynda 28 993 bala tárbıe alyp jatyr. Onyń ishinde memlekettik balabaqshaǵa 16 154 jáne jeke menshik balabaqshaǵa 12 839 bala barǵan.
Buǵan deıin qalalyq bilim basqarmasynyń basshysy kórý jáne sóıleý qabiletinen aırylǵan balalarǵa arnalǵan balabaqsha ashylǵanyn málim etti.
Sondaı-aq, Sh. Seısenbaı óz sózinde elorda balabaqshalarynda qaýipsizdikti qamtamasyz etý maqsatynda jedel áreket etý ortalyǵyn ashý týraly aıtyp ótti.
Odan bólek , Nur-Sultan qalalyq máslıhatynyń jalpy otyrysynda bıyl 1 qyrkúıekten bastap elorda balabaqshalarynda vaýcherlik qarjylandyrý júıesi engiziletini aıtyldy.
