Nur-Sultanda «Baqytty kelinshek kitaby» motıvatsııalyq jınaǵy jaryq kórdi
Derekti-motıvatsııalyq týyndyny jýrnalıst, teleprodıýser, PhD doktory, kópbalaly ana Alma Saılaýqyzy 15 mamyr – Halyqaralyq otbasy kúni qarsańynda shyǵaryp otyr.
«Meniń kitabym baqytty, ózine senimdi, tolyqqandy qazaq áıeli týraly bolmaq. Ózderińiz biletindeı, bizdiń el Eýrazııa qurlyǵynda ornalasqan jáne áıelder boıynda shyǵys danalyǵy men eýropalyq maqsatqa jetý, bilim alý qasıetteri ushtasyp jatyr. Dál osyndaı qasıettermen Shyǵystan da, Batystan da erekshelenemiz, óz biregeıligimiz bar. Bul kitapta qazirgi zamanǵy qazaq áıeliniń beınesin ashyp, onyń baǵdaryn kórsetip, jumys isteýge, oqýǵa jáne balalardy tárbıeleýge úlgergen tabysty kópbalaly ananyń qupııasyn ashqym keldi», - deıdi kitap avtory Alma Saılaýqyzy Rixos qonaqúıinde ótken tusaýkeser rásiminde.
Kitap baqytty qyz, baqytty jar, baqytty kelin, baqytty ana, baqytty qaryndas, baqytty ápke, baqytty sińli, baqytty jeńge, baqytty maman jáne baqytty qurby bólimderinen quralǵan.
«Kitaptyń janryn derekti-motıvatsııalyq týyndy dep qoıdyq. Derekti degenimiz, óz ómirimdegi shynaıy ómirde bolǵan oqıǵalardy negizge ala otyryp, ǵalymdardyń, psıhologtardyń, Alash arystarynyń tujyrymdaryn saraptaı otyryp, dáıekti túrde jetkizýge tyrystym. Ony jazýǵa bir jyldaı ýaqyt ketti, bul jumysty besinshi sábıimdi dúnıege ákelip, dekrettik demalysta jáne karantınde otyrǵanda qolǵa aldym», - deıdi A. Saılaýqyzy.
Ázirge jınaqtyń myń danasy shyǵarylǵan, ony «Qazyna» onlaın kitap dúkenine satyp alýǵa bolady.
«Baqytty kelinshek kitaby» bizdiń oqyrmandar úshin jańalyq bolady dep oılaımyn. Óıtkeni, bizde poezııa, proza, túrli esseler kitaptar shyǵady, biraq dál osyndaı motıvatsııalyq, psıhologııalyq jáne qyzdarymyzǵa tárbıe beretin kitap bizde joq. Bizge motıvatsııalyq, tárbıelik baǵyttaǵy kitaptardy sheteldiń avtorlary jazý kerek sııaqty, tek solardy ǵana oqýymyz kerek sııaqty. Al shyn máninde ózimizde de bar. Alma Saılaýqyzy PhD doktory, osy salany zerttep júrgen ǵalym retinde osy ıdeıany kóterip jatyr jáne óziniń ómir jolyndaǵy oıǵa túıgen tujyrymdaryn jazdy. Sondyqtan, avtor jańa bir baǵytqa jol ashyp otyr, bul kitap qyz-kelinshekterge qajet dep oılaımyn», - deıdi aqyn, EUÝ dotsenti Ońaıgúl Turjan.
