Nur-Sultanda azamattyq jáne qyzmettik qarý ıelerin tekserip jatyr

NUR-SULTAN. QazAqparat – Atys qarýy qoldanylatyn qylmystardyń aldyn alý, azamattyq jáne zańsyz qarý aınalymyn memlekettik baqylaýdy júzege asyrý maqsatynda 17 mamyrdan bastap qala aýmaǵynda «Qarý» jedel-aldyn alý sharasy ótýde, dep habarlaıdy QazAqparat Nur-Sultan qalasy PD baspasóz qyzmetine silteme jasap.

Azamattyq, qyzmettik jáne marapat qarýy ıelerin tekserý uıymdastyryldy. Tirkelmegen atys qarýy, oq-dári, jarylǵysh zattar men qurylǵylardy zańsyz aınalymnan anyqtaý jáne tárkileý boıynsha sharalar júrgizilýde.

Aldyn alý sharalaranyń eki kúni ishinde 1 300 qarý ıeleri tekserildi, qarýdy saqtaý jáne alyp júrý tártibin buzýdyń 16 faktisi, qarýdy qaıta tirkeý tártibin buzý boıynsha 14 fakti anyqtaldy. Odan bólek, tirkelgen qarý aınalymy talabynyń buzylýyna baılanysty 46 qarý tárkilendi.

Reıd barysynda «Zelenaıa roşa» saıajaı qoǵamynda polıtseıler 21 jastaǵy qala turǵynyn toqtatty. Tekserý kezinde azamattyń kúrtesiniń qaltasynan tapansha tabyldy.

Gaz tapanshasynyń uńǵyny aýystyrý arqyly qaıta jasalǵany anyqtaldy. Bul patrondarmen jaraqat salatyn tapansha sııaqty atýǵa múmkindik beredi. Atalǵan fakti boıynsha azamatqa qatysty QR QK-niń 287-babyna saı qylmystyq is qozǵaldy.