Nur-Sultanda azamattardy KVI-ǵa qarsy revaktsınatsııalaý bastaldy

NUR-SULTAN. QazAqparat - Elordalyq medıtsınalyq uıymdarda 9 aı buryn koronavırýsqa qarsy vaktsına alǵan azamattardyń revaktsınatsııasy bastaldy, dep habarlaıdy QazAqparat qala ákimdiginiń resmı saıtyna silteme jasap.

Osylaısha, búginnen bastap medıtsınalyq qyzmetkerler, sanıtarlyq-epıdemıologııalyq qyzmet qyzmetkerleri men pedagogter qaıta egiledi. Sondaı-aq, bul tizimge medıtsınalyq-áleýmettik mekemelerdiń qyzmetkerleri men kontıngenti, kúsh qurylymdarynyń qyzmetkerleri kirdi.

«Búgin biz aqpan-naýryz aılarynda alǵashqy bolyp ekpe alǵan azamattardy revaktsınatsııalaýǵa kirisemiz. Sonymen qatar, 6 aı buryn QazVac jáne qytaılyq Vero Cell preparatynyń dozasyn alǵan adamdar revaktsınatsııaǵa jatady. Komponentter arasyndaǵy aralyqty saqtaý óte mańyzdy. Bizdiń vaktsınatsııa pýnkterinde bul protsedýra úshin jetkilikti mólsherde doza bar. Sonymen qatar, KVI - ǵa qarsy vaktsınamen revaktsınatsııa júrgizýge bolady», - dedi qalalyq Densaýlyq saqtaý basqarmasy basshysynyń orynbasary Álııa Rústemova.

Ol sondaı-aq, qalada Pfizer preparatymen vaktsınatsııalaý jalǵasyp jatqanyn aıtty. Pfizer vaktsınatsııasy bastalǵannan beri bir apta ishinde elordada júkti áıelder, 12-18 jas aralyǵyndaǵy balalar men bala emizetin analar qatarynan 3 600-den astam qala turǵyny egildi.

Nur-Sultan qalasy boıynsha 1 komponentpen vaktsınatsııalanǵandar sany 465 myń adamdy qurady, ekinshi komponentti 427 myńnan astam azamat aldy.