Nur-Sultanda az qamtylǵan otbasylardy nesıeleý sharasy bastaldy

NUR-SULTAN. QazAqparat - Elordalyq turǵyn-úı qory «Nurly jer» baǵdarlamasy boıynsha «Az qamtylǵan otbasylardy turǵyn-úı satyp alý úshin nesıeleý» aıasynda joldama qabyldaý bastaldy. Bul týraly ákimdiginiń saıty habarlaıdy.

Joldama alý úshin ótinishter aǵymdaǵy jyldyń 17-31 shildesi aralyǵynda qabyldanady (I kezeń).

«Esterińizge sala keteıik, baǵdarlamaǵa kópbalaly otbasy, tolyq emes otbasy, múgedek balalary bar nemese tárbıelep otyrǵan otbasy sanattarynda kezekte turǵandar qatysa alady. Budan basqa, baǵdarlamanyń sharttary boıynsha otbasynyń bir múshesine shaqqandaǵy tabysy 42500 teńgeden aspaýy tıis. Nesıeleýdiń eń kóp somasy 15 mln. teńgeni quraıdy. Nesıe merzimi 20 jylǵa deıin, bastapqy jarna - turǵyn úı qunynyń 10% mólsherinde. Turǵyn úıdi bastapqy jáne qaıtalama naryqta satyp alýǵa bolady. Bul rette bastapqy jarnanyń bir bóligin jabý úshin 1 mln. teńge mólsherindegi turǵyn úı sertıfıkaty tek bastapqy naryqta turǵyn úı satyp alýǵa arnalǵan»,-delingen habarlamada.

Osy baǵdarlama boıynsha ótý úshin 3 kezeńnen ótý kerek: Turǵyn úı qorynan joldama alý (R. Qoshqarbaev d-y, 39); Joldamamen TÚQJB-ne júginý jáne óziniń tólem qabilettiligin rastaý; Eger Siz bastapqy naryqty tańdasańyz, onda Sizdi 1 mln teńge mólsherindegi turǵyn úı sertıfıkatyn alý úshin Dostyq kóshesi, 13 mekenjaıynda ornalasqan Jumyspen qamtý jáne áleýmettik qorǵaý basqarmasyna joldaıdy, al eger qaıtalama naryq bolsa, onda TÚQJB shotyna turǵyn úı qunynyń 10% bastapqy jarnasyn salý qajet. Joldama alǵannan keıin azamattar «Qazaqstannyń turǵyn úı qurylys jınaq banki» AQ-na nesıe alýǵa ótinim berýi úshin jolyǵýlary qajet.