Nur-Sultanda az qamtylǵan otbasy balalaryna arnalǵan oqý ortalyǵy ashyldy
Búgin elorda ákiminiń orynbasary Baqtııar Mákenniń qatysýymen kópbalaly otbasylardaǵy oqýshylardy daıarlaýǵa arnalǵan «Bilim All» bilim ortalyǵy ashyldy.
B.Máken turǵyndardyń áleýmettik bastamalaryn júzege asyrý mańyzdy ekenin atap ótip, ortalyq ujymynyń jumysyna sáttilik tiledi.
Ortalyqta kópbalaly jáne qoldaýǵa muqtaj otbasylarda tárbıelenetin balalar ártúrli kýrstarǵa aqysyz qatysa alady. Ortalyqta kúndizgi toptar, orys, qazaq, aǵylshyn jáne arab tilderi, matematıka kýrstary, shahmat úıirmesi, óner sheberhanasy, gıtara jáne dombyra synyptary bar.
«Birinshi maqsatymyz – balalarǵa zaman talabyna saı qoljetimdi bilim berý. Biz QR Prezıdentiniń Joldaýyn, atap aıtqanda, qosymsha bilim berý aıasyn keńeıtý týraly usynysyn tolyǵymen qoldaımyz. Bul jumyspen bizdiń ortalyq tikeleı aınalysady», – deıdi ortalyq jetekshisi Raıgúl Serikbaeva.
Munda barlyǵy 300-ge jýyq bala oqı alady. Oqý ortalyǵy Strong Mothers Ns qoǵamdyq qory men Nur-Sultan qalalyq ákimdiginiń qoldaýymen ashyldy.
«Munda óte qyzyq. Muǵalimder sabaqty jaqsy túsindiredi», – deıdi 7-synyp oqýshysy Fatıma Sharapatova.
«Ortalyqtyń ashylýyn óte uzaq kúttik. Osy kýrstarǵa barýǵa múmkindik bergen Strong Mothers qoǵamdyq qoryna rızashylyǵymdy bildirgim keledi. Qyzym osynda aǵylshyn kýrsyna barady. Alǵashqy kúnderden-aq jaqsy nátıje kórsetýde, mektepke daıyndalyp jatqan ulymdy da osynda ákelemin», – deıdi oqýshylardyń anasy Ánel.
Aıta keteıik, kópbalaly analar aqysyz negizde kompıýterlik saýattylyq boıynsha qosymsha kýrstardan óte alady. Qazirgi ýaqytta ortalyqta jıyrmaǵa jýyq ana bilim alýda.
«Ózim kópbalaly ana retinde osynda kompıýterlik saýattylyǵymdy arttyryp, biraz nátıjege qol jetkizdim. Ortalyqty ashýǵa qoldaý bildirgen ákimdikke, qoǵamdyq qor múshelerine alǵys aıtamyn», – deıdi Gúlmıra esimdi kópbalaly ana.
«Bilim All» ortalyǵy Ýálıhanov kóshesi, 3 mekenjaıynda ornalasqan. Qazir toptarda bes baladan kóp emes. Balany tirkeý úshin keńsege kelip, qajetti qujattardy tapsyrý kerek.
