Nur-Sultanda áıel qudyqqa qulaǵan aýmaqqa jaýapty kompanııamen kelisimshart úzildi
NUR-SULTAN. QazAqparat – Keshe Nur-Sultan qalasynda áıel qudyqqa qulap ketti. Oryn alǵan jaısyz oqıǵaǵa qatysty qalalyq ákimdik túsinikteme berdi, dep habarlaıdy QazAqparat tilshisi.
«Áıel qudyqqa túsip ketken aýmaqqa jaýapty merdiger kompanııamen kelisimshart úzildi. Atalǵan kompanııa jumysynan kemshilik anyqtaldy. Oqıǵa oryn alǵan jer ýchaskesinde jóndeý jumystary bitpegen jáne ol paıdalaný balansyna ótpegen. Jergilikti atqarýshy organdar beti ashyq káriz qudyqtaryn jabý jumystaryn kúndelikti negizde júrgizip jatyr», - dedi Nur-Sultan qalasy ákiminiń baspasóz hatshysy Aqmaral Oljabaeva.
Onyń aıtýynsha, qalalyq Kólik jáne jol-kólik ınfraqurylymyn damytý basqarmasy káriz qudyqtaryna qatysty qosymsha tekserý júrgizetin bolady.
Eske sala ketsek, keshe Nur-Sultanda áıel adam qudyqqa qulap ketkeni týraly habarlaǵan bolatynbyz.
«Qutqarý satysynyń jáne qutqarýshylar men polıtsııa qyzmetkerleriniń birlesken áreketiniń arqasynda áıel adam qudyqtan aman-esen shyǵarylyp, ol jedel járdem qyzmetkerlerine tapsyryldy. Budan soń 1- kóp salaly qalalyq aýrýhanaǵa jetkizilgen. Qazirgi kezde densaýlyq jaǵdaıy qanaǵattanarlyq, úıine jiberildi»,-dep habarlaǵan bolatyn Nur-Sultan qalalyq Tótenshe jaǵdaı departamenti.
