Nur-Sultanda áıel balasymen birge kóp qabatty úıdiń balkonynan sekirmek bolǵan
NUR-SULTAN. QazAqparat – Áıel balasymen 12 qabatty turǵyn úıdiń balkonynan sekirmek bolǵan, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.
«22 qazan kúni saǵat 17:30-da Kýbrın kóshesiniń boıynda polıtsııa kapıtany Qaırat Narımanov kóp qabatty úıdiń balkonynan aıaǵyn salbyratyp turǵan áıeldi baıqaǵan. Onyń qolynda balasy bolǵan. Ol sekirý nıetimen balkonnyń qanatynda otyrǵan.
Ony baıqaǵan polıtseı dereý kireberiske qaraı júgirip, joǵary kóterilgen. Esiktiń sańylaýynan áıeldiń ony baıqamaı turǵanyn paıdalanyp, polıtsııa qyzmetkeri áıeldi ustap qalady», - dep málimdedi Polıtsııa departamentiniń baspasóz qyzmetinen.
21 jastaǵy jas áıel mundaı qadamǵa otbasylyq janjaldan keıin barmaq bolǵan. Onyń qolynda bir jarym jasar balasy bolǵan.
«Ol kúni men bir táýliktik kezekshilikten keıin demalysta edim. Balalarymmen balabaqshadan qaıtyp kele jatyp, úreılenip turǵan azamattar men balkonnyń qanatynda otyrǵan áıeldi baıqadym. Oılanbastan kireberiske qaraı júgirdim, osy kezde menimen bir kýáger lıftige birge kirdi. Qýanyshqa oraı, áıeldi aman alyp qaldyq», - dedi polıtseı.
Jas anany osyndaı jaǵdaıǵa jetkizgen jubaıyna qatysty qorǵaý nusqamasy shyǵyp, otbasy qatań baqylaýǵa alyndy. Áıelmen profılaktıkalyq áńgime júrgizilip, psıhologııalyq kómek kórsetildi.
