Nur-Sultanda áıel adamnyń máıiti tabyldy
102 pýltine Áýezov kóshesindegi úıdiń turǵynynan baspaldaq alańynda qantalaǵan áıeldiń jatqany týraly habarlama kelip tústi. Oqıǵa ornyna kelgen polıtseıler dene jaraqattary bar 34 jastaǵy áıeldiń máıitin tapty.
Elordalyq jedel ýákilder jedel is-sharalar júrgizý barysynda bir táýliktiń ishinde Aqmola oblysynyń aýmaǵynda 37 jastaǵy kúdiktini ustady.
Belgili bolǵanyndaı, er adam bir kún buryn aýlada jas áıelmen tanysyp, bos ýaqytyn ótkizý úshin ony páterine shaqyrǵan. Otyrys barysynda kúdikti men qonaqtyń arasynda janjal týyndap, er adam ziltemirdiń sabymen áıeldi birneshe ret urǵan. Áıeldiń esinen tanyp bara jatqanyn kórgen ol ony páterden alyp shyǵyp, baspaldaq alańynda qaldyrǵan.
«Kisi óltirý faktisi boıynsha qylmystyq is qozǵaldy, kúdikti PD ýaqytsha ustaý ızolıatoryna qamaldy, tergeý amaldary júrgizilýde»,-delingen habarlamada.