Nur-Sultanda avtobýs apatqa ushyrap, 6 adam aýrýhanaǵa tústi
NUR-SULTAN. QazAqparat – Elordada jolaýshylar avtobýsy apatqa ushyrady, dep habarlaıdy QazAqparat qalalyq polıtsııa departamentine silteme jasap.
29 jeltoqsan saǵat 11:38-de Táýelsizdik dańǵylynyń boıynda jeńil avtokólik pen avtobýs soqtyǵysyp qaldy.
47 jastaǵy áıel «Volkswagen Polo» avtokóligin basqaryp kele jatyp, oryn aýystyrǵan kezde manevrdiń qaýipsizdigine kóz jetkizbeı, marshrýttyq avtobýspen soqtyǵysqan.
Jol-kólik oqıǵasynyń saldarynan avtobýs jaryqtandyrý tiregine soǵyldy.
Aýrýhanaǵa marshrýttyq avtobýstyń 5 jolaýshysy men «Volkswagen Polo» avtokóliginiń júrgizýshisi jetkizildi.
Atalǵan fakti boıynsha tergeý júrip jatyr.
Polıtsııa departamenti júrgizýshilerden qozǵalys kezinde barynsha muqııat bolýdy, jyldamdyq rejımin, qaýipsiz qashyqtyqty jáne manevr jasaý erejelerin múltiksiz saqtaýdy suraıdy.
