Nur-Sultanda aýyl sharýashylyǵy jármeńkesi ótip jatyr
Jármeńkede qala turǵyndaryna sıyr eti, jylqy eti men qoı eti, qus eti, sút jáne ashyǵan sút ónimderi, kókónister (kartop, pııaz, sábiz, qyryqqabat), jemister, taýyq jumyrtqasy, balyq, jarma, joǵary surypty un jáne ózge de qajetti azyq-túlik ónimderi usynylady.
«Búgin Qaraǵandy, Aqmola, Pavlodar oblystarynyń aýyl sharýashylyǵy ónimderin óndirýshilerdiń, sol sııaqty «aınalym tetigi» aıasynda Nur-Sultan qalasynyń saýda nysandaryna taýar jetkizýshi kásipkerlerdiń qatysýymen jármeńke ótip jatyr. Jármeńke sondaı-aq aımaqaralyq kooperatsııa aıasynda ótkizilip jatyr. Jármeńkege 150-ge tarta kásipker óz ónimderin qoıdy. Onyń barysynda naryqtaǵy baǵadan 10-15 paıyzǵa arzan, jańa jetkizilgen 250 tonnaǵa jýyq ónim qoıylady. Munda alypsatarlarǵa jol berilmeıdi, tikeleı tutynýshyǵa jetkiziledi», – dedi Nur-Sultan qalasynyń Investıtsııalar jáne kásipkerlikti damytý basqarmasy bóliminiń basshysy Rýslan Ydyrysov.
Jármeńkeden jylqy etiniń kılogramyn 2200 teńgege, sıyr etin 2000 teńgege, qoı etin 2000 teńgege, qus etin 1000 teńgege, pisirilgen shujyqty 850-2000 teńgege, kartopty 140 teńgege satyp alýǵa bolady.
«Biz Qaraǵandy óńirinen kelip otyrmyz. Bas qalamyzda ótip jatqan jármeńkege shujyq ónimderin jetkizdik. Nur-Sultan ákimdigi ózderinde ótetin jármeńkelerge turaqty túrde shaqyryp turady. Jyl saıyn osynda kelip saýda jasap turamyz. Elordaǵa shujyqtarymyzdyń eń dámdisin alyp keldik. Kelińizder, satyp alyńyzdar. Bári óte dámdi», – dedi «Kolbasnyı tseh «Metsger» JShS ókili Raýshan Ermekova.
Qala turǵyndary jármeńkeniń ornalasqan jeri yńǵaıly ekenin jetkizdi.
«Men osy mańaıǵa jaqyn jerde turamyn. Sol sebepti maǵan bazarǵa emes jármeńkege barý yńǵaıly. Jármeńkeniń turǵan jeri de jaqsy, qalanyń eń kórikti jerleriniń biri. Baǵalary da qoljetimdi. Jármeńkeniń aıaqtalatyny ókinishti. Sońǵy bir aıda et, kókónis, jemis-jıdekti kóbirek aldym. Baǵalary qolaıly boldy. Kóp adam osy jerden saýda jasap ketedi», – dedi qala turǵyny Baný Ahmetjanova.
Buǵan deıin aýyl sharýashylyǵy jármeńkelerinde 5 myń tonnaǵa jýyq ónim usynylǵan bolatyn. Aýyl sharýashylyǵy jármeńkesine respýblıkanyń barlyq oblystarynan taýar óndirýshiler qatysty.
