Nur-Sultanda aýla keńistigin qurýdyń jańa tásili engizildi
NUR-SULTAN. QazAqparat – Elordada aýla keńistigin qurýdyń jańa tásili engizildi. Elordanyń jańa aýlalarynda tynysh oryndar men sporttyq aýmaqtar ashylady. Onda balalar da, eresekter de, zeınetkerler de bos ýaqytyn tıimdi ótkize alady. Sonymen qatar, úı janýarlarymen serýendeýge de jaǵdaı jasalady, dep habarlaıdy QazAqparat qalalyq ákimdiktiń resmı saıtyna silteme jasap.
Memleket basshysynyń tapsyrmasy boıynsha elorda ákimdigi buqaralyq sportty damytýǵa jáne oǵan jurttyń qyzyǵýshylyǵyn arttyrýǵa erekshe kóńil bóledi. Osylaısha, aýlalar men qoǵamdyq keńistikterdi (saıabaqtar, gúlzarlar, jelekjoldar) salý jáne abattandyrý boıynsha aýqymdy jumystar jalǵasýda.
Osy maýsymda ǵana elorda ákimdigi 120 aýla men 40 qoǵamdyq keńistik salady. Sol sııaqty eski oryndar jóndeýden ótedi. Budan bólek aýlalary joq úılerge, qaraýsyz qalǵan ýchaskelerge, bos oryndarǵa basa nazar aýdarylatyn bolady. Aýlalar men qoǵamdyq keńistikterdi salý jáne abattandyrý kezinde qalanyń eski bóligi men turǵyn alaptaryna erekshe kóńil bólinedi. Jumystar qalanyń barlyq aýdanyn qamtıdy.
Mysaly, Baıqońyr aýdanynda (Beısekbaev kóshesi 21, Abaı kóshesi 101, Táshenov kóshesi 17/1) aýla keńistikteriniń qurylysy belsendi júrgizilýde. Sondaı-aq, sol aýdanda ornalasqan Alataý shaǵyn aýdany aýlaishilik aýmaqtarmen qorshalady. Shaǵyn aýdanda toǵyz úlken aýla abattandyrylady, bul jaqyn mańdaǵy barlyq turǵyn úıdi (Imanov kóshesi 32, 32/1, 32/2, 34, 36; Beısekbaev kóshesi 1, 3; Tarhan kóshesi 5, 5/1, 7, 7/1) qamtýǵa múmkindik beredi. Úı turǵyndary aýla keńistikteriniń ashylýyn asyǵa kútip júrgenin jetkizdi.
«Qurylys jumysynyń aıaqtalýyn asyǵa kútip júrmiz. Óz aýlamyzdyń bolǵanyn 20 jyldan astam ýaqyt boıy armandadyq. Endi tipti ıtterdi serýendetýge arnalǵan ornymyz bolady. Balalar óte qýanyshty. Olar jazǵy demalysyn jańa aýlada ótkizýdi josparlap otyr. Tipti, dostaryn qonaqqa da shaqyryp qoıdy», - dedi Beısekbaev kóshesi, 21 úı turǵyny Tatıana.
Jańa aýlalarda sportpen shynyǵý quraldary, oıyn keshenderi, túrli átkenshekter, balalarǵa arnalǵan tóbeshikter, qumsalǵyshtar sekildi jaǵdaı qarastyrylatyn bolady. Sol sııaqty tynysh aımaqta qarttarǵa arnalǵan besedkalar bar.
«Eki balanyń anasy retinde jańa aýla salynyp jatqanyna qýanyp júrmin. Buryn balalarymdy oınatý úshin kórshi aýlaǵa baratynbyz. Endi bári ózimizde ashylatyn boldy. Bul óte yńǵaıly», - dedi Aınur esimdi Táshenov kóshesi, 17/1 úıiniń turǵyny.
Esterińizge sala keteıik, 2020 jyly Nur-Sultan ákimdigi 76 gektardan astam jerdi abattandyrdy. Bul – shamamen 150 aýla jáne 60 qoǵamdyq keńistik (saıabaq, gúlzar, jelekjol). Osylaısha elorda halqynyń tórtten bir bóliginde sportpen aınalysyp, serýendeýge arnalǵan oryndar ashyldy. Bıyl qala turǵyndarynyń jartysyna arnap, aýlalar men qoǵamdyq keńistikter salynady.
Aýlalardy abattandyrý kezinde kógaldandyrýǵa da erekshe kóńil bólinedi. Bıyl qalada bir mıllıonnan astam jasyl jelek (aǵashtar, butalar, kóshetter jáne t.b.), onyń ishinde elordanyń «jasyl beldeýine» otyrǵyzý josparlanýda.
Elorda «Nur-Sultan – jaıly qala» master-jospary aıasynda damyp keledi.
