Nur-Sultanda Aýǵan jaýyngerlerin eske alý sharasy ótti

NUR-SULTAN. QazAqparat - Elordada Aýǵanstanda ınternatsıonaldyq boryshyn óteý kezinde qaza tapqan qazaqstandyqtarǵa arnalǵan memorıaldyń janynda shekteýli áskerı kontıngenttiń shyǵarylǵanyna 42 jyl tolýyna oraı eske alý sharasy ótti, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Oǵan Aýǵan soǵysynyń ardagerleri, qorǵanys vedomstvosynyń jáne basqa da kúshtik qurylymdardyń ókilderi, Keńes Odaǵynyń batyry, Halyq qaharmany, armııa generaly Saǵadat Nurmaǵambetov atyndaǵy Qorǵanys mınıstrliginiń áskerı kolledjiniń tárbıelenýshileri qatysty.

Tarıh enshisindegi oqıǵalar soǵys ardagerleriniń esinde, sondyqtan osyndaı árbir kezdesý erekshe qundy.

– Aýǵanstan – ótken tarıh qana emes. Bul – sarbazdardyń áskerı boryshyn oryndaýdaǵy tabandylyǵy men batyldyǵynyń, senim men patrıottyq rýhynyń nyshany. Jaýyngerlerdiń áskerı jáne azamattyq paryzyn erlikpen oryndaǵany árdaıym jadymyzda, – dedi Aýǵan soǵysynyń ardageri, tárbıe jáne ıdeologııalyq jumys departamenti bastyǵynyń orynbasary general-maıor Muqan Dúısekeev.

Búgingi tańda Qazaqstanda Aýǵan soǵysyna qatysqan 15 myńnan astam adam turady.

Eske alý sharasyn «Aýǵan soǵysynyń múgedekteri men ardagerleri odaǵy» qoǵamdyq birlestigi, Qorǵanys mınıstrligi jáne Nur-Sultan qalasynyń ákimdigi uıymdastyrdy.