Nur-Sultanda aýdan ákimderi halyq aldynda esep berip jatyr

NUR-SULTAN. QazAqparat - Saryarqa aýdanynyń ákimi Eset Baıkenniń esep berý kezdesýinde elorda turǵyndary 350-den astam áleýmettik mańyzdy máseleni kóterdi, dep habarlaıdy QazAqparat.

Qala turǵyndary tarapynan jıi qoıylatyn suraqtar - qalanyń kólik jáne kommýnaldyq qyzmetteriniń jumysy (qar tazalaý, qoǵamdyq kólik qozǵalysynyń kestesi, joldardy jóndeý jáne salý, abattandyrý), qala kóshelerin jaryqtandyrý, memlekettik baǵdarlamalardaǵy kezektiń júrýi, densaýlyq saqtaý jáne bilim berý nysandaryn salý, múlikti jarııa etý máseleleri.

Ár saýal boıynsha jazbasha nemese aýyzsha túsinikteme berildi.

Kelesi esepti kezdesýdi Esil aýdanynyń ákimi Berik Jákenov ótkizedi.

Onlaın-formattaǵy kezdesý 1-3 aqpanda ákimdiktiń YouTube jáne Facebook platformasynda ótedi.

Aıta keteıik, aýdan ákimderiniń esep berý kezdesýi 27 qańtarda bastalyp, 5 aqpanǵa deıin jalǵasady.

Koronavırýs pandemııasyna baılanysty kezdesýler onlaın formatta ótedi.

Qatysyp, óz aýdanynyń ákimine nemese qala ákimine suraq qoıǵysy keletinder myna siltemede tirkelip, tıisti nusqaýlardy oryndaýy tıis.

10 aqpan kúni saǵat 10:00-de Nur-Sultan qalasynyń ákimi Altaı Kólginov qorytyndy kezdesý ótkizedi.

Kezdesý elorda ákimdiginiń YouTube jáne Facebook resmı akkaýnttarynda, resmı saıtynda kórsetiledi.

Esep berý kezdesýleriniń kestesimen osy siltemede tanysýǵa bolady.