Nur-Sultanda aýa raıynyń qolaısyzdyǵynan ótken túnde júzge tarta jol-kólik oqıǵasy tirkeldi
NUR-SULTAN. QazAqparat - Qar jaýyp, boran soqqan elordada bir túnde ǵana júzge tarta jol-kólik oqıǵasy tirkelip otyr, dep habarlaıdy QazAqparat tilshisi.
«Búgin tańerteńgi saǵat 09.00-de Qaraǵandy tas joly boıyndaǵy «Keńmart» gıpermarketi men janarmaı quıý beketi arasynda jolda 1972 jyly týǵan júrgizýshi kólik tizginine ıe bola almaı, №80 avtobýsty aryqqa qulatyp alǵan. Avtobýsta 9 jolaýshy bolǵan. Jaraqat alǵandar joq. Patrýldik polıtsııanyń úsh ekıpajynyń kómegimen barlyq jolaýshylar «Vstrecha» dúkeniniń janyndaǵy jyly aıaldamaǵa jetkizildi», - dep habarlaıdy ákimdikten.
Arada birneshe mınýt ótkende dál sol jolda jedel járdem kóligi №80 avtobýspen soqtyǵysyp qalmaıyn dep, shuǵyl toqtaǵan. Osynyń saldarynan №29 baǵyttaǵy avtobýs jedel járdem kóliginiń artynan soqqan. Jaraqat alǵandar joq. Oqıǵa ornynda polıtsııa qyzmetkerleri jumys istep jatyr.
«Qurmetti júrgizýshiler! Nur-Sultan qalasynyń polıtsııa departamenti aýa-raıynyń nasharlaýyna baılanysty joldyń jekelegen ýchaskeleri kólik quraldary úshin jabylatyndyǵyn eskertedi. Departamenttiń jeke quramy tolyǵymen halyqqa kómek kórsetý úshin jumys isteýde. Biz elorda turǵyndarynan túsinistik tanytýdy suraımyz: patrýldik polıtsııanyń talaptaryn saqtap, jeke kólik quraldaryn jol boıynda qaldyrmańyz jáne tazalaý quraldaryna kedergi keltirmeńiz. 23 qańtarǵa qaraǵan túni júzge jýyq jol-kólik oqıǵasy tirkeldi. Zardap shekkender joq», - dep habarlaıdy qala ákimdiginiń baspasóz qyzmetinen.
