Nur-Sultanda AÓSShK elderiniń ekonomıka boıynsha yntymaqtastyq máseleleri talqylandy
Qazaqstannyń Syrtqy ister mınıstriniń birinshi orynbasary Shahrat Nuryshev Azııadaǵy ózara is-qımyl jáne senim sharalary jónindegi keńeske (AÓSShK) múshe jáne baıqaýshy memleketterdiń Qazaqstandaǵy Elshileri jáne ózge de qonaqtar úshin arnaıy uıymdastyrylǵan Dıplomatııalyq iskerlik klýbtyń kezekti otyrysyna qatysty.
Sondaı-aq, bul is-sharaǵa AÓSShK Hatshylyǵynyń, «Atameken» UKP jáne jergilikti isker toptardyń ókilderi qatysty.
Sh.Nuryshev óz baıandamasynda «qazirgi jaǵdaıda AÓSShK elderi arasyndaǵy ekonomıkalyq ólshemdegi yntymaqtastyqty nyǵaıtý erekshe mańyzǵa ıe» ekenin atap ótti. Bul turǵyda ol osy kezdesý, sondaı-aq Qazaqstannyń 2020-2022 jyldar aralyǵyndaǵy AÓSShK-ge tóraǵalyǵy aıasynda uıymdastyrylýy josparlanǵan is-sharalarǵa, atap aıtqanda iskerlik keńestiń otyrysy, bıznes forým, týrızm jónindegi forým sııaqty t.b. is-sharalar múddeli taraptar arasynda iskerlik baılanystar ornatýǵa yqpal etetinine senim bildirdi.
Sonymen birge, Sh.Nuryshev jaqynda AÓSShK-de epıdemıologııalyq qaýipsizdik, densaýlyq saqtaý jáne farmatsevtıka salasynda jańa senim sharasynyń qabyldanǵanyn habarlap, bul yntymaqtastyq kókjıegin edáýir keńeıtetinin jáne AÓSShK elderiniń memlekettik mekemeleri men isker toptary arasynda ózara is-qımyldyń keleshegine úlken jol ashatynyn atap ótti.
Іs-shara barysynda AÓSShK Hatshylyǵynyń Atqarýshy dırektory Qaırat Sarybaı, «Atameken» UKP basqarma tóraǵasynyń birinshi orynbasary Narıman Ábilshaıyqov, Dıplomatııalyq iskerlik klýbtyń teń tóraǵalary Islambek Saljanov jáne Majarstan Elshisi Mıhaı Galoshfaı, birqatar qazaqstandyq isker top ókilderi de prezentatsııalar jasady.
Jıynǵa qatysýshylar yntymaqtastyqty keńeıtýdiń yqtımal joldaryn talqylaý úshin osyndaı kezdesýlerdiń paıdaly ekendigin atap ótti jáne bolashaqta osy formattaǵy pikirtalastardy jalǵastyrýǵa qyzyǵýshylyq bildirdi.
