Nur-Sultanda amal merekesi - kórisý kúni toılandy
NUR-SULTAN. QazAqparat - Nur-Sultan qalasyndaǵy Dostyq úıinde Qazaqstan halqy assambleıasy ókilderiniń qatysýymen qazaq halqynyń ulttyq meıramy – kórisý kúni atap ótildi, dep habarlaıdy QazAqparat qala ákimdiginiń resmı saıtyna silteme jasap.
Bul kún — «Adam aýzy aqqa, mal aýzy kókke tıdi» dep adamnyń adammen, jyldyń jylmen kórisetin kúni.
Bul kúnniń bir ereksheligi – buryn-sońdy bir-birine ókpe-nazy bar aǵaıyn-týys arazdastyqty joıyp, tatýlasyp, tabysady.
Tós qaǵystyryp, mal-janynyń amandyǵyn surasyp, qystan aman shyqqandyqtaryna táýbe keltiredi.
Merekelik is-sharada jurtshylyq bir-birimen amandasyp, jaqsylyq tilep qana qoımaı jasy úlkenderge qurmet kórsetip, iltıpat bildiretin dástúrler kórinis tapty.
Sol sııaqty bir-birine syılyq syılaý dástúri de umyt qalǵan joq.
Dostyq úıinde ótken is-shara qazaq ultynyń ǵana emes polıak, ózbek, sheshen-ıngýsh, nemis, tatar-bashqurt etnomádenı birlestikteriniń uıymdastyrýymen ótti.
«El aýzynda 14 naýryz Amal kúni, Kórisý kúni dep atalyp ketken. Osyǵan oraı elordamyzdaǵy Dostyq úıinde Qazaqstan halqy assambleıasynyń bastamasymen úlken sharalar ótip jatyr. Jalpysynda bul mereke – kóne zamannan kele jatqan dástúr. Kezinde Máshhúr Júsip babamyz naýryzdyń basy – 14 naýryz, segiz kún toılanady degen. Bul kúni qystan aman-esen shyqqan el bir-birinen mal aman ba, jan aman ba dep kórisetin. Biz kóshpeli halyq bolǵannan keıin odan ótý ońaı bolmaıtyn. Jut bolyp, mal qyrylatyn. Sodan aman qalǵan halyq qýanyp, bir-birimen kórisedi eken», - deıdi tarıh ǵylymdarynyń doktory, professor, QR Kórkem Akademııasynyń akademıgi Marat Ábsemet.
Ol sózin jalǵaı otyryp, kórisý kúni jurtshylyq ulttyq kıimderin kıip, dastarhanyn tátti-dámdige toltyratynyn aıryqsha atap ótti.
«Bul meıram jaıly kezinde Máshhúr Júsip Kópeıuly, Mirjaqyp Dýlatuly, Ahmet Baıtursynuly jazǵan. Odan erterekte Buqar jyraý óleńderinde de kezdesedi. Erte kezde toılanǵanmen KSRO zamanynda 70 jyl toılanbaı qaldy. Bala kúnimde úlken kisilerdiń jasyryn toılaıtynyn talaı márte kórdim. Qazaq dalasynda Amal kúnin ásirese Batys Qazaqstan óńiri jaqsyraq saqtap qaldy. Keńes quramynda júrgende biraz dástúr umytylyp, ulttyq merekelerdiń toılanýyna tyıym salynǵan. Biraq elimizdiń ár óńirinde jekeleı saqtalyp, bertin kele egemendik alǵan kúnnen bastap jańǵyryp jatyr. Bárimiz bir el, bir halyq bolyp toılap jatyrmyz. Keremet emes pe!? Ata-babamyzdan kele jatqan jaqsy dástúrlerimizdi basqa ulttar kórip jatyr», - dedi ǵalym Marat Ábsemet.
Saltanatty shara barysynda halqymyzdyń «Qyzdar-aı», «Aýylymyz qandaı tamasha!» ánderi shyrqalyp, ulttyq ónerimiz dáripteldi.
Al aqsaqaldar qatary el amandyǵy men jurt tynyshtyǵyn tilep aq bata berse, kelinder jaǵy sálem salý dástúrin úlgi etti.
Aıta keteıik, búgin Memleket basshysy Qasym-Jomart Toqaev Qazaqstan halqyn Kórisý kúnimen quttyqtady.
