Nur-Sultanda áleýmettik paketter taratylyp jatyr
Nur-Sultanda 10 naýryzdan bastap AÁK alatyn otbasylardyń 1 men 6 jas aralyǵyndaǵy balalaryna azyq-túlik pen turmystyq hımııa taýarlary berile bastaıdy. Kepildendirilgen áleýmettik paketter elordanyń 4 aýdanyndaǵy «Magným» JShS saýda jelisiniń 5 sýpermarketinde belgilengen keste boıynsha beriledi.
Jalpy, memlekettik áleýmettik kómek 4,4 myńnan asa balany qamtıdy. Olardyń ata-analary osy jyldyń qańtar-aqpan aılarynda AÁK alý jóninde ótinish bergen bolatyn. Aıta ketsek, 1 men 6 jas aralyǵyndaǵy balalarǵa arnalǵan áleýmettik kómekke azyq-túlik pen turmystyq hımııa taýarlary kiredi.
Bul jıyntyq az qamtylǵan otbasylaryndaǵy ár balaǵa toqsanyna bir ret beriledi. Qazirgi ýaqytta dúrlikpe men kezekterdiń aldyn alý maqsatynda elordalyq jumyspen qamtý jáne áleýmettik qorǵaý Basqarmasy kepildendirilgen áleýmettik paketter alýshylardyń tizimin jasady. Áleýmettik paketter aı saıyn keste boıynsha beriledi. Árbir berý pýnktinde jaýapty tulǵalar bekitilgen. Áleýmettik paketti alýshylar óz JSN-di https://www.magnum.kz/garantirovannaya-socialnaya-pomoshh saıtyna engizip, tizimde bar-joǵyn teksere alady. Olardyń aty-jóni kún saıyn alfavıttik tártippen jarııalanatynyn eske salamyz.
Kestede azamattardyń kepildendirilgen áleýmettik paketterdi qashan jáne qaıdan alýǵa bolatyny jáne azamattardyń sýpermarketiń qaı fılıalyna bekitilgeni kórsetilgen. Kómek alýshy tizimnen ózin tapqannan keıin ózi bekitilgen Magnum fılıalyna barýy qajet. Kepildendirilgen áleýmettik paketter beriletin «Magným» saýda jelisi sýpermarketteriniń meken-jaılary: Almaty aýdany, Edil kóshesi, 26, Jansúgirov kóshesi, 8/1 «B» lıteri; Baıqońyr aýdany, Sh. Ýálıhanov kóshesi, 20; Esil aýdany, Turan dańǵyly, 55 «D»; Saryarqa aýdany, Alash tas joly, 23/1.
